Լարված իրավիճակ՝ Երևանում. հարյուրավոր վարորդներ սպառնում են դիմել կտրուկ միջոցների

Հարյուրավոր վարորդներից ահազանգում են, որ սկսելու են բողոքի զանգվածային ակցիաներ, քանի որ վարչապետի աշխատակազմի ղեկավար Արայիկ Հարությունյանի խոսքը գործ չդարձավ։
Այսօր՝ ապրիլի 28-ին, ֆոտոլրագրող Գագիկ Շամշյանի հետ զրույցում վարորդներն ասում էին.

«Հենց հիմա նորից մեզ խաբված զգացինք։ Վարչապետի աշխատակազմի ղեկավարն էնպիսի մի լուրջ հայացքով մեզ կուտ տվեց, որ ասելու չէ։ Հիմա ի՞նչ եղավ այդ 1 միլիարդը։ Երևի կամ տեղ չհասավ, կամ էլ Նաջարյանը փոշմանեց։ Երկու դեպքում էլ տուժեցինք մենք՝ վարորդներն ու քաղաքացիները։ Ամեն օր հազարավոր մեքենաներ են այստեղով անցնում ու ամեն օր փոսերի, այդ թվում՝ մարդաբոյ, մեջ ընկնելով ամենաքաղցր խոսքերն ենք ուղղում պատասխանատուներին։ Հենց հիմա տրամադրված ենք վերսկսել մեր բողոքի ակցիաները։ Էլ չենք հավատում ոչ թաղապետին, ոչ քաղաքապետին, ոչ կառավարության աշխատակազմի ղեկավարին, մնում է հենց ուղիղ դիմենք Նիկոլ Փաշինյանին ու ասենք, որ էս Արին Բերդի փողոցը եկեք փոխենք, անունը դնենք Թրամփի փողոց, գուցե այդ ժամանակ Արայիկ Հարությունյանի ասած 1 միլիարդը տեղ հասնի ու սկսվի 30 տարուց ավելի էս ավերակ ճանապարհի հիմնանորոգումը»։

2025 թ․ ապրիլի 15-ին ֆոտոլրագրող Գագիկ Շամշյանի հետ զրույցում բազմաթիվ վարորդներ ասում էին.

«21-րդ դարում ենք ապրում, բայց ասես քարե դարում լինենք: 5-6 տարի է՝ «Տեցի կռուգ»-ից դեպի Արին Բերդի փողոց գնացող մոտ 1,5-2 կմ-անոց ճանապարհահատվածն ասես մեր գլխին փորձանք լինի: Առանց չափազանցության՝ ամեն սանտիմետրում փոսեր են, որոշ հատվածներում էլ՝ «մարդաբոյ»: Ամեն օր ավտոմեքենաներ ենք ջարդում, գույքահարկը վճարում ենք կանոնավոր, բայց փոխարենը որակյալ ճանապարհին կարոտ ենք մնացել:

Էդ անտերը երազում էլ չենք տեսնում. թե՛ արթուն, թե՛ քնած՝ էս քանդած ճանապարհն ենք տեսնում:

Երևանի քաղաքապետ Տիգրան Ավինյանին ուզում ենք հիշեցնել իր քարոզարշավի հիմնական կարգախոսը՝ «ասեք, կանենք». մեռանք ասելով, մեռանք գրելով, բայց՝ ձայն բարբառո հանապատի:

Հարգելի՛ չինովնիկներ, գուցե ձեր քունքին հաճելի է, որ ամեն անգամ փոսը ընկնելիս մենք ձեզ, չակերտավոր ասած, ամենաքաղցր, իսկ եթե ճիշտ՝ ամենավերջին խոսքերն ենք ուղղում: Ամոթն էլ լավ բան է: Եթե ձեր պարգևներից մի փոքր ուղղեք՝ էս ճանապարհը ասֆալտապատելուն, հաստատ կարժանանաք վարորդների, ինչու չէ՝ նաև քաղաքացիների օրհնանքին:

Էլ չենք ասում, որ երբ եղանակն անձրևում է, փոսերը դառնում են արհեստական լճակներ, արտաքին լուսավորման մասին էլ խոսք չկա, գիշերը պիտի մոմ վառես, որ անվտանգ անցնես էդ ճանապարհով: Նույնիսկ մի անգամ բողոքի ակցիա իրականացրին՝ փակելով ճանապարհը: Խոստացան, թե ճանապարհը բացեք, ամիսների ընթացքում գործը գլուխ կբերենք. էս 3-4 տարի է՝ ասես ջայլամի քաղաքականություն վարեք: Առաջիկայում ընտրութւուններ են լինելու, ի՞նչ երեսով եք գալու ու մեզնից ձայներ խնդրելու: Էդ ժամանակ կստանաք մեր պատասխանը, իսկ պատասխանը հստակ է, որ հայտնի ֆիլմի հերոսի նման՝ «Դիփունքը խաբում ին»»:

Ֆոտոլրագրողը հայտնել էր, որ փոսերն այնքան շատ են, որ երբեմն վարորդները չուզենալով ավտոմեքենաները փախցնում էին փոսերից ու ստիպված երթևեկում էին հանդիպակաց, ինչը կարող էր դառնալ ավտովթարների պատճառ: