Պաշտոնեական դիրքի չարաշահման մեջ մեղադրվող պրոռեկտորը շարունակում է պաշտոնավարել
Հայկական պետական մանկավարժական համալսարանի պրոռեկտոր Մարիամ Իսպիրյանը, ով մեղադրվում է պաշտոնեական դիրքի չարաշահման մեջ, շարունակում է պաշտոնավարել։
Մարիամ Իսպիրյանի և վերջինիս որդու ձերբակալության մասին հայտնի դարձավ ապրիլի 18-ին։ Նույն վարույթով ձերբակալվել էր նաև Շախմատի ֆեդերացիայի նախագահի առաջին տեղակալ Սմբատ Լպուտյանը, որը 2012 թվականից Համալսարանի Շախմատի և սպորտի ամբիոնի վարիչն է: Ըստ քրեական վարույթի՝ պրոռեկտորը որդուն աշխատանքի է ընդունել բուհում, սակայն որդին աշխատանքի չի ներկայացել։
Դատախազությունից «Փաստինֆո»-ն տեղեկանում է, որ համալսարանի պրոռեկտոր Մարիամ Իսպիրյանը մեղադրվում է պաշտոնեական դիրքի չարաշահման մեջ, նրա որդին՝ խարդախության, Սմբատ Լպուտյանը՝ խարդախության օժանդակության և պաշտոնեական կեղծիքի մեջ։
Բոլոր մեղադրյալների նկատմամբ էլ որպես խափանման միջոց է ընտրվել բացակայելու արգելքը։ Նշված խափանման միջոցի կիրառումը հարցեր է առաջացնում հատկապես պրոռեկտորի դեպքում, ի վերջո, վերջինիս մեղադրանքն առնչվում է հենց պաշտոնեական դիրքին, հետևաբար, պարզ չէ, թե ինչու իրավապահները չեն կասեցրել նրա պաշտոնավարումը՝ առնվազն կանխելու հնարավոր նոր չարաշահումները կամ աշխատակիցների վրա ազդեցությունը, ինչը նաեւ քննության օբյեկտիվության վրա կարող է ազդել։ Այս համատեքստում չենք կարող չհիշել նախորդ տարի համալսարանի ռեկտորի, մյուս պրոռեկտորի և այլ աշխատակիցների վերաբերյալ գործը, որով վերջիններիս պաշտոնավարումը կասեցվել է, հետևաբար, իրավապահների այս երկակի մոտեցումը մեղմ ասած հարցեր է առաջացնում։ Նկատենք, որ «Փաստինֆո»-ի հարցերին ի պատասխան վարույթն իրականացնող մարմնից որեւէ պարզաբանում չի տրվել, այլ միայն հաստատվել, որ պրոռեկտորի լիազորությունները կասեցված չեն։
Թերեւս Մարիամ Իսպիրյանն, իսկապես, ունի ազդեցիկ հովանավոր (ներ), այլապես դժվար է պատկերացնել նրա անձի նկատմամբ ՀԿԿ-ի նման հոգատար վերաբերմունքը։ Ի դեպ, ըստ մամուլում շրջանառվող տեղեկությունների՝ լավ հարաբերություններ ունի քպականների հետ, հատուկ շեշտվում է նաեւ ԿԳՄՍ նախարար Ժաննա Անդրեասյանի անունը։
Հեղինակ՝ Իզաբել Սահակյան
Հետևեք մեզ Viber-ում
