Նեթանյահուն մտադիր է ՑԱԽԱԼ-ի վրա բարդել Լիբանանում Իսրայելի ձախողումը․ Israel Hayom

Իսրայելի վարչապետ Բենիամին Նեթանյահուն ցանկանում է Լիբանանում «Հեզբոլլահի» դեմ ձախողված գործողության համար մեղադրել երկրի Զինված ուժերին (ՑԱԽԱԼ)։ Այս մասին հայտնում է Israel Hayom (IH) պորտալը՝ հղում անելով իր աղբյուրներին։

«Զինվորականների դժգոհությունը միայն այսբերգի գագաթն է։ Բանակում աճում է այն զգացողությունը, թե Նեթանյահուն «քավության նոխազ» է փնտրում։ Նա ցանկանում է ինչ-որ մեկի վրա բարդել Լիբանանում գրանցված հիասթափեցնող և Իրանում ստացված մասնակի արդյունքների պատասխանատվությունը»,- նշված է հոդվածում։

Պորտալի աղբյուրները պատասխանատվությունը բանակի վրա բարդելու փորձի հետ են կապում նաև վարչապետի վերջին հայտարարությունը, որով նա հրամայել էր հարվածներ հասցնել Լիբանանում «Հեզբոլլահի» թիրախներին՝ չնայած գործող զինադադարին։ Այդուհանդերձ, պարբերականի զրուցակիցների կարծիքով՝ սա զուտ հասարակական դժգոհությունը մեղմելու նպատակով իրականացվող քաղաքական հնարք է, քանի որ ՑԱԽԱԼ-ի ստացած հրահանգները փաստացի մնացել են անփոփոխ։

«Այս հարձակման մեջ արտառոց ոչինչ չկար, և այն հաստատ «հզոր» անվանել չի կարելի։ Ինչպես նշում են բարձրաստիճան զինվորականները, ամեն ինչ եղել է «խաղի կանոնների սահմաններում». ՑԱԽԱԼ-ը հարվածել է միայն Լիբանանի հարավին և բացառապես այն կետերին, որտեղ խաղաղ բնակիչներ չեն եղել»,- գրում է IH-ը։

Պորտալի աղբյուրների փոխանցմամբ՝ իսրայելցի զինվորականների և երկրի ղեկավարության միջև տարաձայնությունները գնալով խորանում են։ Նշվում է նաև, որ Նեթանյահուն կարող է Իրանում կրած ձախողման պատասխանատվությունը բարդել նաև «Մոսադ» հետախուզական ծառայության վրա։

Նեթանյահուի գրասենյակը ապրիլի 25-ին հայտնել էր, որ վարչապետը ՑԱԽԱԼ-ին հրամայել է հարվածներ հասցնել Լիբանանում «Հեզբոլլահի» դիրքերին։ Նման որոշում էր կայացվել Իսրայելի հյուսիսային տարածքների և Լիբանանի հարավում տեղակայված զորքերի ուղղությամբ արձակված հրթիռների ու անօդաչու թռչող սարքերի (ԱԹՍ) պատճառով։ Այդ ժամանակ էլ իսրայելական բանակը հայտնել է հանրապետության հարավում գտնվող օբյեկտներին հասցված հարվածների մասին։