Ալիևի բախտը

Վրաստանի էներգետիկայի նախարար Կախա Կալաձեն ժամանել էր Բաքու` վարելու կարևոր բանակցություններ էներգետիկ ոլորտում: Վրացի նախարարը հանդիպումներ է ունեցել Ադրբեջանի նախագահի ու SOCAR ընկերության ղեկավարի հետ։ Վրաստանի էներգետիկայի նախարար Կախա Կալաձեն հայտարարել է, որ փաստացիորեն ձեռք է բերված Ադրբեջանից հավելյալ ծավալի գազ ստանալու մասին հիմնական պայմանավորվածությունը։ Կալաձեն նաև հայտնել է, որ կա Շահ Դենիզ խողովակաշարից հավելյալ ծավալի գազ ստանալու հնարավորություն: «Ես հանդիպեցի նախագահ Ալիևի հետ, և մենք քննարկեցինք մեր երկրների միջև գոյություն ունեցող բարեկամական հարաբերությունները։ Քննարկվել է նաև Շահ Դենիզ նախագծի միջազգային կարևորությունը, դրա իրագործման ընթացքը։ Ես հանդիպեցի նաև SOCAR-ի նախագահի հետ, քննարկեցինք մեր ապագա համագործակցությունը, հավելյալ ծավալի գազ ստանալու հարցը, ինչը մեծ անհրաժեշտություն է՝ կապված մեր ներքին սպառման հետ։ Մենք փաստացիորեն հանգեցինք հիմնական համաձայնագրին, և լինելու է հնարավորություն, որպեսզի հավելյալ ծավալներ ստանանք Շահ Դենիզ խողովակաշարից»,- ասել է նա։ Իր հերթին Ադրբեջանի նախագահ Իլհամ Ալիևը երկուշաբթի «Հարավային գազային միջանցք» նախագծի Խորհրդատվական խորհրդի շրջանակներում նախարարների երկրորդ նիստում նշել է, թե 2015թ. կարևոր ձեռքբերումներից մեկը կապված է TANAP («Անդրանատոլիական» գազատար) նախագծի հիմքը դնելու հետ: Հիշեցնենք, որ անցյալ տարի Թուրքիայի Կարս նահանգում տեղի է ունեցել TANAP-ի հիմքը դնելու արարողությունը՝ Թուրքիայի, Վրաստանի և Ադրբեջանի նախագահների մասնակցությամբ: «Վստահ եմ, որ Խորհրդատվական խորհրդի այսօրվա նիստում Դուք նաև կբարձրացնեք հարցեր, որոնց լուծումը սպասվում է 2016թ.: 2016թ. կարևոր է տվյալ նախագծի իրագործման գործում… Կարող են լինել որոշ ձգձգումներ, ներքին խոչընդոտներ: Սակայն կարծում եմ՝ մեր երկրների կառավարությունները կօգտագործեն բոլոր հնարավորությունները այդ խոչընդոտները հաղթահարելու համար»,- ասել է Ալիևը: Ադրբեջանի էներգետիկ կարևորությունը վերջին շաբաթներին սկսել է ակնհայտորեն աճել, այս հանգամանքը սկսել են փաստել ու արժևորել ոչ միայն տարածաշրջանի երկրները, այլև` արևմտյան երկրներն ու կառույցները: ԵՄ-ի դիվանագիտության ղեկավար Ֆեդերիկա Մոգերինին, որը նախօրեին Բաքվում մասնակցել էր «Հարավային գազային միջանցք» նախագծի Խորհրդատվական խորհրդի երկրորդ նիստի աշխատանքներին, հայտարարել է, որ իրենք մշտապես աջակցել են այդ նախագծի իրագործմանը։ Նրա խոսքերով՝ «Հարավային գազային միջանցք»-ը ներդրում կունենա ոչ միայն էներգակիրների դիվերսիֆիկացման, այլև՝ էներգետիկ անվտանգության քաղաքական-տնտեսական կապերի ամրապնդման տեսանկյունից. «ԵՄ-ի անունից շնորհակալություն եմ հայտնում Ադրբեջանին, այդ գործընթացում ներդրում ունենալու համար։ «Հարավային գազային միջանցք»-ը նոր փուլ է ԵՄ-ի ու Ադրբեջանի հարաբերություններում»։ Ահա` Հայաստանի համար այսպիսի ոչ այնքան բարի լուրեր... Թամար Բագրատունի