«Պատրաստ ենք օգնել՝ տեղափոխել Իրանից հարստացված ուրանը». «Ռոսատոմի» ղեկավար
«Պատրաստ ենք օգնել՝ տեղափոխել Իրանից հարստացված ուրանը»,- հայտարարել է «Ռոսատոմի» ղեկավար Ալեքսեյ Լիխաչովը։
Նա նշել է, որ իրանական ու ամերիկյան կողմերի բանակցությունների «առանցքային ու ամենացավոտ» կետերից մեկը հենց հարստացված ուրանի դուրսբերման հարցն է։ Ըստ Լիչախովի՝ դա շատ բարդ է տեխնիկապես, բայց պակաս կարևոր չէ նաև «հետագա պայմանավորվածություններում» վստահության հարցը։
«Եվ այստեղ միայն Ռուսաստանն ունի իրանական կողմի հետ փոխգործակցության դրական փորձ։ 2015 թվականին, իրանական կողմի խնդրանքով, մենք արդեն տեղափոխել ենք հարստացված ուրան՝ Իսլամական Հանրապետությունից։ Պատրաստ ենք այսօր էլ օգնել այդ հարցում»,- ասել է Լիխաչովը՝ «Страна Росатом»-ին։
Նշենք, որ ավելի վաղ Reuters-ը հաղորդել էր, թե ԱՄՆ նախագահ Դոնալդ Թրամփի ծրագրերի մեջ է մտնում հարստացված ուրանի դուրսբերումն Իրանից՝ այն հետագայում ԱՄՆ տեղափոխելու համար։
Իրանի ԱԳՆ պաշտոնական ներկայացուցիչ Իսմայիլ Բաղային իր հերթին հայտարարել էր, որ Իրանից ԱՄՆ կամ որևէ այլ երկիր հարստացված ուրանի տեղափոխման վերաբերյալ որոշում չկա։
Հետևեք մեզ Viber-ում
