14 տարի, և մենք դեռ այստեղ ենք. Սիմեոնեի էմոցիոնալ պոռթկումը Բարսելոնային հաղթելուց հետո

Մադրիդի «Ատլետիկոյի» գլխավոր մարզիչ Դիեգո Սիմեոնեն չկարողացավ զսպել էմոցիաները, երբ Կլեման Տյուրպենի սուլիչն ազդարարեց խաղի ավարտն ու «Բարսելոնայի» նկատմամբ հերթական հաղթանակը։ Արգենտինացի մասնագետը, որին հազվադեպ կարելի է տեսնել ժպիտը դեմքին, այս անգամ տոնում էր իր թիմի դուրս գալը Չեմպիոնների լիգայի կիսաեզրափակիչ։ Այս մասին գրում է armsport.am-ը։

Խաղից հետո Սիմեոնեն խոստովանեց, որ թիմի տրանսֆորմացիան և մրցունակությունը 14 տարի անց էլ շարունակում են հուզել իրեն.

«Արդեն 14 տարի է՝ ես այստեղ եմ, և տեսնել, թե ինչպես է թիմը շարունակում պայքարել, ինձ մեծ ուժ է տալիս։ Մենք բազմիցս սկսել ենք զրոյից, փոխվել են ֆուտբոլիստներ, բայց մենք նորից Եվրոպայի լավագույն չորս թիմերի թվում ենք։ Դա արտակարգ զգացողություն է։ Մենք հսկայական ջանքեր գործադրեցինք 0-2 հաշվի պայմաններում, իսկ հետո խփեցինք մեր գոլը, որն ուղղակի գլուխգործոց էր»։

Սիմեոնեն նաև վերլուծել է խաղի ընթացքը՝ ընդգծելով, որ Բաենայի, Նիկոյի և Սորլոթի մուտքը դաշտ երկրորդ խաղակեսում թիմին անհրաժեշտ կայունություն հաղորդեց.

««Բարսելոնայի» դեմ խաղալու միայն մեկ տարբերակ կա՝ հարձակվել։ Եթե նրանց վրա չես հարձակվում, ապա պարտվում ես։ Նրանք գերազանց են գործում գրոհի գծում, և մենք գիտեինք, որ ստիպված ենք լինելու պաշտպանվել, բայց նաև գիտեինք, որ մեր հնարավորությունն ունենալու ենք»։

Խոսելով Կլեման Լենգլեի մասին, ով առաջին խաղակեսում սխալներ էր թույլ տվել, «Չոլոն» բարձր գնահատեց ֆուտբոլիստի հոգեբանական տոկունությունը.

«Նա արտակարգ տղա է և անհավանական ֆուտբոլիստ։ Հեշտ չէ վերականգնվել նման սխալներից հետո, բայց նա գտավ իր մեջ այդ ուժը և շարունակեց հանդիպումը բարձր մակարդակով»։

Հարցազրույցի վերջում Սիմեոնեն, վերջնականապես թոթափելով լարվածությունը, ամփոփեց.

«Լինել Չեմպիոնների լիգայի կիսաեզրափակչում… Ի՜նչ հրաշալի է»։