Իրանի ցանկությունից է կախված. ՌԴ ԱԳՆ–ն` «Բուշեր» ԱԷԿ ՄԱԿ-ի խաղաղապահներ ուղարկելու մասին

«Բուշեր» ատոմակայանի անվտանգությունն ապահովելու համար ՄԱԿ-ի խաղաղապահների ուղարկումը կախված է Թեհրանի` նրանց ընդունելու պատրաստակամությունից, ՌԻԱ Նովոստիին ասել է ՌԴ ԱԳՆ միջազգային կազմակերպությունների դեպարտամենտի տնօրեն Կիրիլ Լոգվինովը։

Նրա խոսքով՝ ընդունող կողմի համաձայնությունը ՄԱԿ-ի խաղաղապահության ամենակարևոր պայմանն է։

Ավելի վաղ «Բուշեր» ԱԷԿ-ի տարածքը մի քանի անգամ գնդակոծության էր ենթարկվել ԱՄՆ-ի և Իսրայելի կողմից։ Իրանի ատոմային էներգիայի կազմակերպությունը հայտարարել էր, որ «Բուշեր» ԱԷԿ-ի գնդակոծումը ռազմական հանցագործության օրինակ է։ Այս կապակցությամբ Թեհրանը բողոքի նամակ էր հղել ՄԱԳԱՏԷ–ի գլխավոր տնօրեն Ռաֆայել Գրոսիին՝ պահանջելով դատապարտել նման գործողությունները։

Հիշեցնենք` ԱՄՆ-ն և Իսրայելը փետրվարի 28-ի առավոտյան սկսեցին հարվածներ հասցրել Իրանին։ Սպանվեցին երկրի գերագույն հոգևոր առաջնորդ այաթոլլա Ալի Խամենեին, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և պաշտպանության խորհրդի քարտուղար Ալի Շամխանին: Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին:

Իրավիճակի սրացման ֆոնին մի շարք երկրներում վառելիքի գների աճ է նկատվում, ինչը կապված է Հորմուզի նեղուցով նավարկությունը փաստացի սահմանափակելու հետ (Հորմուզի նեղուցը Պարսից ծոցի երկրներից նավթի և հեղուկացված բնական գազի մատակարարման հիմնական երթուղին է)։