Էրդողանի բռնապետական իշխանության հետևանքները

Բրիտանական The Independent թերթի փոխանցմամբ՝ սեփական ժողովրդի հանդեպ Թուրքիայի կառավարության կոշտ գործողությունները, ԴԱԻՇ-ի ահաբեկիչների հետ Անկարայի կապերն ու նախագահ Ռեջեփ Էրդողանի բռնապետական իշխանությունը մյուս երկրների աչքերում ամբողջովին հեղինակազրկել են Թուրքիան։ Ոչ վաղ անցյալում իր հարցազրույցի ժամանակ Մեծ Բրիտանիայում Թուրքիայի նախկին դեսպան Ունալ Չևիքյոզը հայտարարել էր, որ այժմ ԱՄՆ-ն ու միջազգային դաշինքն Անկարային դիտարկում են ոչ թե որպես օգնական, այլ՝ ավելի շուտ որպես բեռ. «Երկիրը վերջնականապես կորցրել է կարևոր խաղացողի իր տեղը տարածաշրջանում, որը կարող է նպաստել հարցերի լուծմանն ու կոլնֆլիկտների կարգավորմանը»։ Պետության «անկման» հարցում առանցքային դերակատարում է ունեցել երկրի նախագահը, որը վերջին շրջանում հաճախ է քամահրանք ցուցադրում ոչ միայն միջազգային իրավունքի, այլև՝ մարդու հիմնական իրավունքների ու ազատությունների նկատմամբ։ Աղաղակող վերջին դեպքն այն էր, երբ Էրդողանը հայտարարեց, որ չի ճանաչում ՍԴ-ի որոշումը՝ կապված լրագրողներ Ջան Դյունդարի ու Էրդեմ Գյուլի ազատ արձակման հետ։ Դրանով նա հատեց բոլոր սահմաններն ու նախագահին դարձրեց հասարակության համար չափազանց վտանգավոր։ Էրդողանն ամենուրեք տեսնում է թշնամիներ, և մշտապես աճում է նախագահին վիրավորելու համար մեղադրվողների թիվը։ Ներկա դրությամբ նրանց թիվը հասել է 1845-ի։