Փաշինյանը Մոսկվայում ինքն իրեն «մերկացրեց»․ Զատուլին (video)

ՌԴ Պետդումայի ԱՊՀ հարցերով, եվրասիական ինտեգրման և հայրենակիցների հետ կապերի հանձնաժողովի նախագահի առաջին տեղակալ Կոնստանտին Զատուլին-ը Alpha News-ին մեկնաբանել է ՀՀ վարչապետ Նիկոլ Փաշինյան-ի և ՌԴ նախագահ Վլադիմիր Պուտին-ի՝ Մոսկվայում կայացած հանդիպումը։

«Կարծում եմ՝ արժե գնահատել այն հումորի զգացումը, որը հատուկ է Կրեմլում որոշումներ կայացնողներին. հանդիպումը կազմակերպվել էր ապրիլի 1-ին՝ Ծիծաղի օրը, ինչը, ըստ էության, հնարավորություն տվեց Փաշինյանին ինքն իրեն բացահայտելու։ Ինչո՞ւ եմ այսպես կարծում։ Քանի որ այն հաշվարկներն ու վերլուծությունը, որոնք ներկայացրեց Ռուսաստանի նախագահը, Փաշինյանը որևէ կետով չկարողացավ կասկածի տակ դնել։

Պուտինը նշեց, որ տնտեսական հարաբերությունների զարգացումից գոհ են, սակայն միաժամանակ արձանագրեց, որ մեկ տարվա ընթացքում ապրանքաշրջանառությունը նվազել է՝ 11 միլիարդ դոլարից հասնելով մոտ 6 միլիարդի։ Նա նաև ընդգծեց, որ շուկայում գազի գինը կազմում է շուրջ 600 դոլար հազար խորանարդ մետրի համար, մինչդեռ Ռուսաստանը այն վաճառում է 177 դոլարով, և նույնիսկ այդ պայմաններում Երևանը դժգոհություն է հայտնում։

Ի պատասխան՝ Փաշինյանը նշել է, որ Հայաստանը շարունակում է այլընտրանքներ փնտրել։ Հետաքրքիր է հասկանալ, թե ներկայիս պայմաններում որտեղ է հնարավոր գտնել ավելի շահավետ առաջարկ», — ասել է Զատուլինը։

Պատգամավորը կարևորել է նաև Ռուսաստանի նախագահի այն հայտարարությունը, որ անհնար է միաժամանակ լինել և՛ Եվրասիական տնտեսական միության, և՛ Եվրոպական միության անդամ։

«Պուտինը հստակ ասաց՝ անհնար է համատեղել ԵԱՏՄ և ԵՄ անդամակցությունը։ Փաշինյանը համաձայնեց, սակայն նշեց, որ ընտրության ժամանակը դեռ չի հասել։ Միևնույն ժամանակ նա չի անդրադառնում այն հանգամանքին, որ երկու տարի առաջ խորհրդարանն ընդունել էր ԵՄ-ին անդամակցության գործընթացի մեկնարկի մասին օրենք՝ առանց Միության կողմից որևէ հրավերի։

Այդ քայլի նպատակը, ըստ Զատուլինի, հասարակական ընկալումների փոփոխությունն էր, Ռուսաստանի հետ կապերի թուլացումն ու Եվրոպայում «ավելի լավ կյանքի» պատկեր ստեղծելը։ Սակայն, նրա խոսքով, Հայաստանին այս պահին Ռուսաստանի իրական փոխարինում չի առաջարկվում՝ ոչ ռազմական, ոչ քաղաքական, ոչ էլ տնտեսական ոլորտներում», — նշել է նա։

Զատուլինի կարծիքով՝ Փաշինյանը կփորձի հանդիպումը ներկայացնել որպես հաջողություն՝ ընդգծելով, որ ընդունվում է ինչպես Ռուսաստանում, այնպես էլ Արևմուտքում։

«Ժողովրդավարության մասին խոսակցությունների ֆոնին տարակուսելի է այն պնդումը, թե Հայաստանը ամենաժողովրդավարական երկիրն է։ Վարչապետը շրջապատված է ուժային կառույցներով, մի շարք հոգևորականներ գտնվում են կալանքի տակ, իսկ եկեղեցին ենթարկվում է քննադատության։ Խնդիր է ներկայացվում նաև երկքաղաքացիության հարցը՝ օրինակ բերելով Սամվել Կարապետյանին։

Պուտինը այս թեմաներին անդրադարձավ մեղմ ձևով, սակայն հանդիպման ընդհանուր բովանդակությունը ակնհայտ էր», — եզրափակել է պատգամավորը։