«Հրապարակ»․ Սահմանամերձ Այգեձորի կամուրջը վթարային է դարձել՝ փակվել

 «Հրապարակ օրաթերթը» գրում է.  Մարտի 28-ին Բերդ համայնքի սահմանամերձ Այգեձոր գյուղից ՆԳՆ օպերատիվ կառավարման կենտրոն ահազանգ է ստացվել, որ Այգեձորում վնասվել է Խնձորուտ գետի կամուրջը։ Այգեձոր համայնքի երկարամյա ղեկավար, 2017 թվականից Այգեձոր բնակավայրի վարչական ղեկավար Լորիս Միրզոյանը մեզ հայտնեց, որ կամրջի երկու կողմում գտնվող պատվարները վնասվել են: Կամուրջը չի փլուզվել, սակայն դրանով տրանսպորտային միջոցների երթեւեկը դադարեցվել է, կամուրջը փակվել է փրկարար ծառայության ժապավեններով։

Սահմանամերձ գյուղի բնակիչները մտահոգված են, քանզի կամուրջը կարեւոր նշանակություն ունի։ Այգեձորի վարչական ղեկավարն ասաց, որ վթարային դարձած կամրջով Այգեձոր եւ Չինարի գյուղերի բնակիչները գնում են իրենց հողատարածքներ։ Բացի այդ, կամուրջն Այգեձորում գործող պահածոների «Էկո Գարդեն» գործարան տանող ճանապարհին է։ Բնակիչները հույս ունեն, որ Խնձորուտ գետում ջրի մակարդակն իջնելուց հետո կամուրջը կրկին կբացվի, ու այն կրկին կշահագործվի տրանսպորտային միջոցների կողմից։ Լ․ Միրզոյանը հայտնեց, որ ներկայում հետիոտներն օգտվում են վթարային կամրջից, սակայն գարնան գյուղատնտեսական աշխատանքների մեկնարկից հետո, երբ դաշտերում հողի մշակության աշխատանքներ արվեն, կամրջի վերականգնման գործը հրատապ է դառնալու։ Վթարային կամրջին այլընտրանքային ճանապարհ չկա, որ Այգեձորի եւ Չինարիի բնակիչներն օգտվեն։ Իսկ եղանակից սպասումները լավատեսություն չեն ներշնչում։ Առաջիկա օրերին Հայաստանի տարածքում անձրեւները շարունակվելու են, որի հետեւանքով Խնձորուտը կարող է ավելի վարարել, կամուրջը քանդել։

Ջերմաստիճանի բարձրացման հետեւանքով սարերում կուտակված ձյունը սկսել է հալվել, եւ առաջացած առվակները միանալով իրար՝ իրենց ճանապարհին ամեն ինչ ավերող մի հսկա գետ են դառնում։ Լ․ Միրզոյանն ասաց, որ ինքը կամրջի վթարային դառնալու մասին հայտնել է Բերդի համայնքապետարան եւ Ազգային անվտանգության ծառայություն։ Բերդի համայնքապետարանի եւ Տավուշի մարզպետարանի ինտերնետային կայքերում որեւէ տեղեկատվություն չկա Այգեձորի կամրջի վթարային դառնալու վերաբերյալ։ Տավուշի մարզպետարանի ինտերնետային կայքում, սակայն, բազում տեղեկություններ կան մարզպետ Հայկ Ղալումյանի՝ Բերդ համայնք կատարած այցերի, այնտեղ հիմնախնդիրների քննարկման վերաբերյալ: Օրինակ, հայտնում են, որ մարտի 10-ին Հ․ Ղալումյանն աշխատանքային այց է կատարել Բերդ համայնք, որի ընթացքում «մարզպետը նախ այցելել է Հախում գետի վրա կառուցվող կամրջի շինհրապարակ, տեղում ծանոթացել է կատարվող աշխատանքներին եւ ընթացիկ փուլին։

Մարտի 17-ին մարզպետ Ղալումյանին տեղեկատվական հարցում եմ արել․ «Հախում գետի կամուրջն ո՞ւմ ֆինանսավորմամբ է կառուցվում, որքա՞ն է ծրագրի արժեքը, ո՞րն է կապալառու կազմակերպությունը, ե՞րբ են մեկնարկել աշխատանքները, ե՞րբ է ծրագրի ավարտը»: Մարզպետի աշխատակազմից պատասխանել են․ «Հախում գետի կամուրջը կառուցվում է Ճանապարհային դեպարտամենտի պատվիրարկմամբ։ Վերոհիշյալ պետական շինարարությունների վերաբերյալ շինարարական կազմակերպությունների եւ պայմանագրային արժեքների տեղեկատվությունը կարող է տրամադրվել տարածքային կառավարման եւ ենթակառուցվածքների նախարարության կողմից»։

Մարզպետն Իջեւանից մեկնել է Բերդ համայնք, Հախում գետի վրա կառուցվող շինհրապարակում ծանոթացել է աշխատանքների ընթացքին, սակայն չգիտի կամ չի ցանկացել հայտնել կամրջի շինարարության հետ կապված կարեւոր մանրամասներ։ Ուրեմն՝ ի՞նչ վստահություն կա, որ գործի նկատմամբ նման վերաբերմունք ունեցող մարզպետի գործուն միջնորդությամբ Այգեձորի կամուրջն արագ կվերականգնվի։ Հավելեմ, որ 2024 թ․ մայիսի 27-ին վարարած Աղստեւ գետը Դիլիջան-Իջեւան հատվածի 10 տեղամասում քանդել է միջպետական ավտոճանապարհի եզրերը, սակայն անցած 2 տարում դրանք դեռ չեն վերանորոգվել։