Մենք լուռ հետևում ենք, թե ինչպես են երկու երիտասարդ մարդ մահանում
Սիրելի բարեկամներ, Հայաստանում կարծեք թե մահն այնքան է էժանացել, իսկ կյանքն՝ այնքան արժեզրկվել, որ մեր բոլորի գիտությամբ, կարելի է ասել՝ մեր աչքի առաջ երկու երիտասարդ մարդ կարող են մահանալ տվյալ դեպքում միայն այն պատճառով, որ 21դ. նրանք խնդրում են իրենց հնարավորություն տալ քրեակատարողական մի հիմնարկից մեկ այլ քրեակատարողական հիմնարկ տեղափոխվել: Չեն թույլատրում: Ոչինչ, ոչինչ չի փոխվելու այդ թույլտվությունից հետո, այդ երկու մարդիկ մնալու են նույն երկրի արդարադատություն կոչվողի հսկողության տակ, նրանք մնալու են կալանավորված, նրանց նկատմամբ քննությունը և դատարանը անելու է նույն գործողությունները, ինչ հիմա է անում, բայց չեն թույլատրում: Չթույլատրելը պատժելու ձև է: Մոտ մեկ ամիս առաջ մեր հասարակությունը մարդասիրաբար դատապարտում էր Բելգիայի միգրացիոն ծառայություններին այն բանի համար, որ նրանք որոշել էին իրենց երկրում ապօրինի ապրող հայկական մի ընտանիք արտաքսել: Արտաքսել՝ չպատժելով: Հետները փող դնել՝ իրենց հայրենիքում նոր կյանք վերսկսելու, բայց իրենց երկրից արտաքսել: Բելգիայում հազար մարդ դուրս եկավ փողոց՝ ըմբոստանալու իրենց իշխանությունների այդ օրինական, իրավական, բայց ոչ մարդկային համարվող որոշման դեմ: Այսինքն այդ երկում օրինական և իրավական երևույթներն անցնում են նաև մարդկային բարոյական արժեքների մաղով: Հիմա մենք լուռ հետևում ենք, թե ինչպես են մեր երկրի քրեա-կատարողական կոչվող հիմնարկում երկու երիտասարդ մարդ մահանում, չնայած նրանց խնդրանքը ոչ անօրինական է, ոչ անիրավական: Առավել ևս՝ անբարոյական: Իհարկե, ես հասկանում եմ, որ մեր հասարակությունը դարձել է շատ հուսահատ, անտարբեր և տխուր, բայց այդ մարդկանց տառապանքը որևէ չափով դրական տրամադրություններ չի բերելու: Մեր հասարակությունում ոչ մեկը երաշխավորված չէ, որ կալանավայրում չի հայտնվի: Կարծում եմ՝ մենք չենք կարող անտարբեր սպասել նրանց մահվանը և հետո սկսել տրտնջալ իշխանությունների դեմ: Ո՞վ է միանում այս նամակին՝ առաջարկելով, պահանջելով ընդառաջել տղաների խնդրանքին, տեղափոխել նրանց Արմավիրի քրեակատարողական հիմնարկ, շանս տալ նրանց ուշքի գալու: Մի՞թե դատական գործընթացի շահն էլ այդ չի պահանջում: Հրանուշ Խառատյանի գրառումը
Հետևեք մեզ Viber-ում
