Թուրքիայի նախագահ Էրդողանը դատի է տվել Քըլըչդարօղլուին

Թուրքիայի նախագահ Ռեջեփ Թայիփ Էրդողանը իր փաստաբան Հուսեյն Այդընի միջոցով Անկարայի դատախազություն հայց է ներկայացրել երկրի գլխավոր ընդդիմադիր ուժի` Ժողովրդահանրապետական կուսակցության նախագահ Քեմալ Քըլըչդարօղլուի դեմ: Այս մասին, ինչպես հաղորդում է «Արմենպրես»-ը, հայտնում է թուրքական «Diken» պարբերականը: Էրդողանը Քըլըչդարօղլուին մեղադրում է 2018թ. հունվարի 5-ին Բեշիքթաշի քաղաքապետարանի առջև ունեցած ելույթի ժամանակ իրեն և իր ընտանիքի անդամներին վիրավորելու մեջ: Քեմալ Քըլըչդարօղլուն հունվարի 5-ին ելույթ է ունեցել Բեշիքթաշի քաղաքապետարանի առջև, որի ժամանակ, անդրադառնալով Բեշիքթաշի քաղաքապետ Մուրաթ Հազինեդարին գյուլենականության մեջ մեղադրելու և պաշտոնից հեռացնելու հանգամանքին, ասել էր. «Մեր քաղաքապետին մեղադրում են գյուլենականների հետ կապեր ունենալու մեջ: Ի՞նչ գյուլենական: Պետական տենդերները դու չե՞ս տվել նրան: Ես շատ լավ գիտեմ, թե որքան գյուլենական ես դու»: Պաշտոնական Անկարան երկրում 2016 թվականի հուլիսի 15-ի ռազմական հեղաշրջման փորձ իրականացնելու մեջ մեղադրում է չափավոր Իսլամի քարոզիչ Ֆեթուլլահ Գյուլենին և նրա հետևորդներին` գյուլենականներին: Հեղաշրջման փորձից հետո երկրի իշխանությունները սկսել են Թուրքիայի մասնավոր և պետական ոլորտները գյուլենականներից զտելու աշխատանքները: Գյուլենը, սակայն, ի սկզբանե հերքել է իր մասնակցությունը կատարվածին: Նա կատարվածի կազմակերպիչ է հայտարարել Թուրքիայի նախագահ Ռեջեփ Թայիփ Էրդողանին, ով այդպիսով փորձել է ամրապնդել իր իշխանությունը: