«Մենք փողոցային պայքարներ նախաձեռնելով մաշեցրել ենք այս իշխանությանը»․ Քոչարյան

«Մենք փողոցային պայքարներ նախաձեռնելով և այլ փողոցային պայքարներին ակտիվ մասնակցությամբ մաշեցրել ենք այս իշխանությանը»․ Այս մասին «Մեծ քաղաքականություն» փոդքատի առաջին թողարկման ժամանակ ասաց ՀՀ երկրորդ նախագահ, «Հայաստան» դաշինքի առաջնորդ Ռոբերտ Քոչարյանը։

«Երբ նայում ենք սոցհարցումները, մոտավորապես 1,5-2 տարի առաջ մարդկանց 60 տոկոսը կողմնորոշված չէր։ Նրանց զգալի մասը մարդիկ են, ովքեր հիասթափվել են ՔՊ-ից, բայց դեռ չեն կողմնորոշվել, թե ում օգտին քվեարկեն։ Հիմա այդ մարդկանց տոկոսը բավական փոքր է՝ մոտ 25-30 տոկոս։ Մենք դաշտ ենք մաքրել այլ քաղաքական ուժերի համար՝ գուցե որոշ չափով մաշեցնելով ինքներս մեզ։ Եվ լավ է, որ կան ուրիշ ուժեր։ Մեր զրույցի ժամանակ արդեն ասել եմ՝ նախկինում 5-6 կուսակցություն մտնում էին խորհրդարան, հիմա նորմալ չէ, որ 3-ը մտնեն։ Համարենք, որ մեր ջանքերը, փողոցային պայքարը, իշխանափոխության լավ հնարավորություն են ստեղծել»,-ասաց Ռոբերտ Քոչարյանը։

ՀՀ երկրորդ նախագահը նշեց, որ հետևում է քաղաքական ուժերի ներկայացրած նախընտրական ծրագրերին և կարծում է, որ դրանք լավն են, սակայն հարց է առաջանում, թե ով կարող է դրանք իրագործել։

«Մարդ, որն ապացուցել է, որ կարող է դա անել, ընդունակ է, քաղաքական թիմ, որն ապացուցել է, որ պայքարող է, թե՞ լրիվ նոր մարդիկ, ովքեր ունեն այդ ցանկությունը, բայց դեռ չունեն փորձ և դեռ պրակտիկ տեսանկյունից չեն դրսևորվել քաղաքական պայքարի մեջ։ Հիմա մենք պետք է դիրքավորենք մեզ, որպես քաղաքական ուժ, և ես ինձ՝ որպես առաջնորդ, որն ընդունակ է, արել է երկու անգամ, ճգնաժամային իրավիճակում բավական լուրջ հաջողությունների հասել է, և կարող է դա անել 3-րդ անգամ։ Սա պետք է լինի մեր մեսիջը մեր ընտրողներին»,-հավելեց նա։

Ռոբերտ Քոչարյանը անդրադարձել է նաև հարցին, թե ինչու է 2018 թվականից հետո Հայաստան վերադարձել, հաշվի առնելով այն հանգամանքը, որ տարբեր խողովակներով նախազգուշացումներ էր ստացել Նիկոլ Փաշինյանից այն մասին, որ Հայաստանում նրան ձերբակալություն է սպասվում։

«Բնավորության հարց է։ Կստացվեր, որ ես թողել, փախել եմ, վախեցել եմ։ Սա ռացիոնալ որոշում չէր և ես գիտեի այդ մասին։ Ես բոլոր հնարավորություններն ունի շատ հանգիստ դրսում ապրելու և բավական լավ գումար էի վաստակում, խնդիրներ ընդհանրապես չէի ունենա։ Եկել եմ մեկ պատճառով՝ այն կերպարը, որ մշտապես ունեցել եմ, ինձ թույլ չի տվել մտածել որ կարող եմ չգալ, ընկալումը կարող էր այնպիսին լիներ, որ վախեցել եմ, թողել, փախել։ Եկա, մտա պայքարի մեջ։ Ես այն մարդը չեմ, ով կարող է դավաճանել իր կողմից որդեգրված արժեքային համակարգին։ Ես համարում եմ, որ իմ տեսակը չէր կարող չգալ Հայաստան ու չպայքարել»,-ասաց ՀՀ երկորրդ նախագահը։