Ջերմուկում ձյան ծածկի բարձրությունը հասնում է մինչև 110 սմ-ի․ Սուրենանյանը վատ լուր է հայտնում

Հայաստանում գարնանային տաք եղանակը դեռ ուշանում է։ Այս մասին հայտնել է Հիդրոօդերևութաբանության և մոնիթորինգի կենտրոնի տնօրենի տեղակալ Գագիկ Սուրենյանը։

Նրա խոսքով՝ եթե անցած տարի այս օրերին հանրապետության մեծ մասում արդեն գրանցվում էին դրական ջերմաստիճաններ, իսկ Արարատյան դաշտում և Երևանում օդի ջերմաստիճանը հասնում էր մինչև +15-17 աստիճանի, ապա այս տարի իրավիճակը տարբեր է։ Այս օրերին երկրի մեծ մասում ձյուն է տեղում, և հանրապետության զգալի հատվածը ձնածածկ է։

«Լեռնային բնակավայրերում ձյան շերտը բավականին բարձր է․ օրինակ՝ Ջերմուկ քաղաքում ձյան ծածկի բարձրությունը հասնում է մինչև 110 սանտիմետրի։

Օդերևութաբանի փոխանցմամբ՝ վաղը գործող ցիկլոնը կկորցնի իր ուժը, իսկ տեղումները կլինեն հանրապետության առանձին հատվածներում՝ կարճատև և թույլ։ Մարտի 9-ի ցերեկվանից մինչև մարտի 13-ը Հայաստան-ի ողջ տարածքում կսահմանվի առանց տեղումների եղանակ։

Եղանակի պարզեցման հետևանքով մարտի 10-ի գիշերը հանրապետությունում օդի ջերմաստիճանը կնվազի մոտ 3-5 աստիճանով։ Առաջիկա 10 օրերին էական տաքացում չի սպասվում»,- նշել է նա։