Իրանը հրադադար չի խնդրել, չնայած երկրի տարածքում ԱՄՆ-ի և Իսրայելի իրականացրած հարվածներին. Աբբաս Արաղչի

Իրանի արտգործնախարար Աբբաս Արաղչին պատասխանել է NBC News-ի հարցին այն մասին՝ արդյոք նա վախենո՞ւմ է ԱՄՆ-ի հնարավոր ցամաքային ներխուժումից։

«Ոչ, մենք սպասում ենք նրանց։ Որովհետև վստահ ենք, որ կարող ենք դիմադրել նրանց, և դա մեծ աղետ կդառնա նրանց համար»,- ասել է նախարարը։

Արաղչին ասել է նաև, որ Իրանը հրադադար չի խնդրել, չնայած երկրի տարածքում ԱՄՆ-ի և Իսրայելի իրականացրած հարվածներին։

«Մենք նույնիսկ նախորդ անգամ հրադադար չենք խնդրել։ Վերջին անգամ Իսրայելն էր խնդրել հրադադար։ Նրանք անվերապահ հրադադար են պահանջել իրենց ագրեսիային 12 օր դիմադրելուց հետո»,- ասել է Արաղչին՝ անդրադառնալով անցյալ տարվա հունիսին տեղի ունեցած 12-օրյա պատերազմին, երբ Իսրայելի և ԱՄՆ-ի ուժերը հարվածել են Իրանի միջուկային օբյեկտներին։

Հեռուստաալիքի լրագրողը հարցրել է նաև Մինաբի տարրական դպրոցի վրա հարձակման մասին, որի հետևանքով զոհվել են տասնյակ աշակերտուհիներ, և հարցրել՝ արդյոք դա կարո՞ղ էր իրանական պատահական ռազմական զինամթերք լինել։

Արաղչին ասել է, որ հարձակման ժամանակ զոհվել է 171 երեխա, և որ երեխաների սպանության համար պատասխանատու են ամերիկյան և իսրայելական ուժերը։

«Դա ասել են մեր զինվորականները։ Այսինքն՝ կամ ԱՄՆ-ն է, կամ Իսրայելը։ Ի՞նչ տարբերություն»,- ասել է Իրանի արտգործնախարարը։

Արաղչին նշել է, որ բանակցությունների ընթացքում տեղի ունեցած հարձակումը խաթարել է ապագա ցանկացած բանակցությունների նկատմամբ Իրանի հետաքրքրությունը։

Նա ընդգծել է, որ անցյալ շաբաթվանից ի վեր չի խոսել ԱՄՆ հատուկ բանագնացների՝ ո՛չ Սթիվ Ուիթքոֆի, ո՛չ էլ Ջարեդ Քուշների հետ։

«Փաստն այն է, որ մենք Միացյալ Նահանգների հետ բանակցություններում դրական փորձ չունենք։ Գիտեք, հատկապես ներկայիս վարչակազմի հետ։ Մենք երկու անգամ բանակցել ենք անցյալ տարի և այս տարի, իսկ հետո նրանք բանակցությունների կեսին հարձակվել են մեզ վրա»,- ասել է Արաղչին։

«Հետևաբար, մենք որևէ պատճառ չենք տեսնում, թե ինչու պետք է կրկին բանակցենք նրանց հետ, ովքեր ազնիվ չեն եղել իրենց բանակցություններում, և նրանք բարեխղճորեն չեն բանակցում»,- հավելել է Իրանի արտգործնախարարը։

Ըստ նրա, ներկայիս հակամարտությունում հաղթող չկա։

«Մեր հաղթանակն անօրինական թիրախներին դիմակայելու մեր կարողության մեջ է, և մինչ այժմ հենց այդպես ենք վարվել»,- ասել է նախարարը։

Հարցազրույցի ընթացքում Արաղչին անդրադարձել է Իրանի նոր գերագույն առաջնորդ այաթոլլահ Ալի Խամենեիի ընտրության հարցին՝ նշելով, որ իրավահաջորդը որոշելու համար կա սահմանադրական գործընթաց։ «Շատ լուրեր կան, բայց գիտեք, մենք պետք է սպասենք, որ Փորձագետների ժողովը ընտրի նոր գերագույն առաջնորդ»,- ասել է Արաղչին՝ ընդգծելով, որ շարունակվող հակամարտության պատճառով գործընթացը կարող է ավելի երկար տևել։

«Ինչպես ասացի, շատ լուրեր կան, բայց ոչ ոք հաստատ չգիտի, թե ի վերջո ով կընտրվի»,- ասել է Իրանի արտգործնախարարը։

Արաղչին արձագանքել է նաև ԱՄՆ նախագահ Դոնալդ Թրամփի՝ Axios-ին տված հայտարարությանը, ըստ որի նա պետք է մասնակցի հաջորդ գերագույն առաջնորդի ընտրությանը։

«Դա Իրանի ժողովրդի բացարձակ անձնական հարց է, և ոչ ոք չի կարող միջամտել»,- ասել է Իրանի արտաքին քաղաքական գերատեսչության ղեկավարը։