Իրանի հետ պատերազմից Իսրայելի տնտեսությանը հասցված վնասը հասնում է մոտ 3 միլիարդ դոլարի. Ֆինանսների նախարարություն

Ըստ Իսրայելի ֆինանսների նախարարության՝ Իրանի հետ պատերազմից Իսրայելի տնտեսությանը հասցված վնասը գնահատվում է շաբաթական 9,4 միլիարդ շեկել (3 միլիարդ ԱՄՆ դոլար), եթե տնտեսական գործունեության համազգային սահմանափակումները շարունակվեն ուժի մեջ մնալ, գրում է Times of Israel-ը։

Չորեքշաբթի թիկունքի հրամանատարության պետ, գեներալ-մայոր Շայ Կլապպերին ուղղված նամակում Ֆինանսների նախարարության գլխավոր տնօրեն Իլան Ռոմը խնդրել է մեղմացնել սահմանափակումները՝ հինգշաբթի օրվանից ձեռնարկությունների և աշխատատեղերի աստիճանական, մասնակի վերաբացման հնարավորություն տալու համար։

«Ոչ ոք չի վիճարկում անվտանգության իրավիճակին ադապտացված պաշտպանական քաղաքականություն պահպանելու անհրաժեշտությունը, սակայն միևնույն ժամանակ, զանգվածային տնտեսական անկումը ենթադրում է լուրջ տնտեսական ծախսեր»,- զգուշացրել է Ռոմն իր նամակում։

«Մեզ անհրաժեշտ է լուծում, որը կբավարարի ինչպես թիկունքի անվտանգության, այնպես էլ տնտեսության կարիքները՝ երկուսուկես տարի տևած տնտեսական ծանր գին վճարելուց հետո՝ անվտանգության կարիքների աճի և [ՀԱՄԱՍ-ի] պատերազմի հետևանքների պատճառով»,- հավելել է նա։ Այն բանից հետո, երբ Իսրայելը և ԱՄՆ-ն շաբաթ օրը համատեղ հարձակում սկսեցին Իրանի դեմ, ինչը հանգեցրեց Իսլամական Հանրապետության կողմից հրթիռային հարվածների, Իսրայելի պաշտպանության բանակի ներքին ռազմաճակատի հրամանատարությունը հրապարակեց համազգային ուղեցույցներ, որոնք արգելում են բոլոր հավաքույթները, կրթական միջոցառումները և աշխատավայրերը, բացառությամբ կենսականորեն կարևոր ձեռնարկություների։

Ուղեցույցները սահմանափակում են տեղաշարժը և ստիպում աշխատակիցներին աշխատել տնից, մինչդեռ դպրոցները մնում են փակ։