Ապրել՝ կյանքի առանցք դարձնելով եղբայրասիրությունը.միասնական աղոթք` Կարբիի Սուրբ Աստվածածին եկեղեցում

Շարունակելով հոգևոր ճանապարհորդությունը` Արագածոտնի թեմի հոգևոր դասը՝ հանդիսապետությամբ Վարչական խորհրդի ատենապետ Հոգեշնորհ Տեր Շնորհք աբեղա Պալոյանի, միասնական աղոթքի էր մեկտեղվել Կարբիի Սուրբ Աստվածածին եկեղեցում:

Հավատացյալները միասնաբար աղոթք են բարձրացրել հանիրավի անազատության մեջ գտնվող սիրելի թեմակալ Առաջնորդ Մկրտիչ Սրբազանի, անազատության մեջ գտնվող հոգևոր հայրերի, զավակների, գերության մեջ պահվող հայորդիների, ինչպես նաև հայրենիքի խաղաղության, մեր Սուրբ Եկեղեցու անսասանության, Հայոց Հայրապետի և ողջ հոգևոր դասի համար։

Ժամերգության ավարտին իր խոսքը ներկաներին ուղղել է եկեղեցու հոգևոր հովիվ՝ Արժանապատիվ Տեր Փառեն քահանա Առաքելյանը: Տեր Հայրն իր խոսքում հավատացյալներին պատգամել է, ապրել՝ կյանքի առանցք դարձնելով եղբայրասիրությունը, նշելով. «Իսպառ մերժեք նախանձը՝ ինքներդ ձեզ բարձր չդասելով և հասկանալով, որ եւ’ կարող եք ընկնել, եւ’ կարող եք ընկած տեղից վեր բարձրանալ»։

Արագածոտնի թեմից հայտնում են, որ Մեծ Պահքի ընթացքում միասնական ժամերգությունները շարունակվելու են ուրբաթ օրերին։