Զինվորի մահվան դեպքին նախորդել է վիճաբանություն. հնչել են կրակոցներ. մանրամասներ

Գեղարքունիքի մարզի զորամասերից մեկում նախօրեին կրակոցների հետևանքով մահացած հայտնաբերված զինծառայող Նարեկ Հակոբյանը Աբովյան համայնքից էր։ Նա ծառայության էր մեկնել 2024 թվականի ամռանը և մի քանի ամսից արդեն զորացրվելու էր։

NEWS.am—ը զրուցել է ինչպես դպրոցի տնօրենի, այնպես էլ մահացած զինծառայողի հարևանների հետ։ Վերջիններս հայտնում են, որ իրենց տեղեկություններով և ինչպես համացանցում են կարդացել, այս դեպքին նախորդել է այն վիճաբանությունը, որի ժամանակ հայհոյանքներ են եղել և դրա պատճառով էլ արդեն կրակոցներ են եղել և զինծառայողը մահացել է։

Հիշեցնենք, որ երեկ երեկոյան քննչական կոմիտեն հայտնեց, որ քրեական վարույթ է նախաձեռնվել և կա մեկ ձերբակալված։

Աբովյանի թիվ 5 դպրոցի տնօրենի պաշտոնակատար Գոհար Վարդանյանը մեզ հետ զրույցում նշեց. ««Առավոտյան դպրոց հաճախելով լսում ենք մի ցավալի լուրի մասին, որ Գեղարքունիքի զորամասերից մեկում զինվոր է զոհվել և այդ զինծառայողը դպրոցի աշակերտ Նարեկ Հակոբյանն է։ Նարեկ Հակոբյանը դպրոց ընդունվել է չորրորդ դասարանից իր քույրիկի հետ միասին, քույրիկը առաջին դասարան, ինքը չորրորդ դասարան։ Իններորդ դասարանն ավարտել է 2021 թվականին, այնուհետև ուսումը շարունակել այլ ուսումնական հաստատությունում։

Նարեկին 6-9–րդ դասարաններում ես ինքս դասավանդել եմ ինֆորմատիկա առարկա, դասերի ընթացքում ինքը բավականին ակտիվ աշակերտ էր, աչքի ընկնող, միշտ պատրաստակամ։ Կարողանում էինք ցանկացած հարցով դիմել, ցանկացած հարցում վստահ լինել Նարեկի վրա։ Կարող եմ նաև փաստել, որ Նարեկ Հակոբյանը իր ուսումնառության տարիներին վայելել է և ուսուցչական անձնակազմի, և ծնողների, և աշակերտների սերն ու հարգանքը։

Նարեկը պատվախնդիր աշակերտ էր և կարողանում էր իր շուրջը տեսնել միայն բարին, միայն դրականը, դա էր պատճառը, որ երբեմն աչքի էր ընկնում և տնօրինության կողմից, և ուսուցչական անձնակազմի կողմից։

Դեպքը շատ ծանր է ամբողջ ուսուցչական անձնակազմի համար, նույնիսկ աշակերտական անձնակազմի համար, որոնք Նարեկի սովորելու տարիներին ճանաչել են Նարեկին։ Ամբողջ ուսուցչական անձնակազմով խոնարհվում ենք Նարեկի ընտանիքի առջև, փառք ու պատիվ մեր զինվորին և տա Աստված, որ երբևէ ոչ մի դեպք, ոչ մի դպրոցի աշակերտի մասին, ոչ մի երեխայի մասին նման լուր ոչ մեկս չլսենք։ Միայն խաղաղություն լինի մեր աշխարհին, մեր հայոց երկրին»։

Նարեկի հարևաններից Ռուզաննա Գրիգորյանն ասաց. «Սոցիալական ցանցերով եմ լսել ու շոկի մեջ էի։ Ճնշումս 200 էր բարձրացել, չէի հասկանում, գիշերը չեմ քնել։ Զինվորը մեր հարևանն է, այստեղ են ապրել, մեզ մոտ է մեծացել, շատ խելացի, խելոք երեխա է եղել, շատ մարդասեր, մարդամոտ, օգնել է բոլորին։ Սիրտս ցավում է, անգամ չեմ կարող խոսել։

Շուտով պետք է զորացրվեր, ծնողները Գերմանիայում են, հայրը գնացել էր բուժման նպատակով։ Տանը երկու տղա, երկու աղջիկ են, մեծ աղջիկը ամուսնացած է, երկու թոռ ունեն։ Լավ ընտանիք է, լավ մարդիկ էին։

Կարգուկանոն չունի բանակը, որ անմեղ երեխեքը զոհ են դառնում։ Ծնողները ջահել են, թոռնիկիս հետ է մեծացել Նարեկը։ Թող նման բան անողը պատասխան տա, թևերը կոտրվեն։ Ասում են՝ գնան բանակ, կատարյալ մարդ դարձած հետ գան։ Խուժան-խուլիգաններին տանում, լցնում են այնտեղ, կարգուկանոն չկա։ Թող պատասխան բոլորը։

Իբրև հայհոյել են, կռիվ է եղել, բայց դա հարցի լուծում չի, անողը պատասխան պիտի տա»։

Նարեկի հարևաններից է նաև սերիալներից հայտնի դերասան Արտավազդ Հովհաննիսյանը, ով NEWS.am—ի հետ զրույցում նշեց, որ ապշած են տեղի ունեցածից. «Ճանաչել ենք որպես լավ տղա, որպես լավ երիտասարդ, չեմ կարողանում ոչ մի բառ ասել։ Նայում ես ու չես հավատում, ուղղակի չես հավատում։ Այսօր հայը հային է արդեն սպանում, չեմ կարողանում նույնիսկ խոսել։ Լավ ջահել, սիրուն երիտասարդ, մի հատ պայծառ լույս տղա, ի՞նչ ասեմ։ Ինչ ուզում է լինի, չի կարող հայ տղան հայ տղու վրա, բանակում զենք բարձրացնի։ Միակ բանը, որ այսօր պիտի լինի, նորից երևի պիտի գա հին ժամանակների նման, որ բանակում ծեծ լինի։ Մենակ այդպես կարող են նորից սանձել այս ջահելությանը, այս ջահելությանը պիտի սանձել»։