«ԿԸՀ-ն, ոստիկանական համակարգը, Սահմանադրական դատարանի կնիքը գտնվում են մեկ անձի ձեռքում». Զարուհի Փոստանջյան
«2017 թվականն այս ավտորիտար համակարգի լճացման գագաթնակետն էր: Այդ մասին վկայում են կատարված քաղաքական իրադարձությունները: Որևէ դրական փոփոխություն մենք չենք արձանագրել, ավելին՝ միայն ու միայն վատթարացում ենք արձանագրել հանրային բոլոր բնագավառներում»,- «Հայելի» ակումբի այսօրվա ասուլիսում անցնող տարին այսպես բնորոշեց «Երկիր Ծիրանի» խմբակցության ղեկավար Զարուհի Փոստանջյանը: Բանախոսը շեշտեց, որ մեր երկրում ընտրությունների միջոցով անհնար է քաղաքական կառուցվածքի փոփոխություն իրականացնել մեկ պարզ պատճառով. «ԿԸՀ-ն, ոստիկանական համակարգը, Սահմանադրական դատարանի կնիքը գտնվում են ավտորիտար համակարգի գլխում կանգնած անձի ձեռքում: Դատական համակարգը ցանկացած երկրի ողնաշարն է և չափազանց կարևոր նշանակություն ունի, իսկ մեր երկրում տվյալ մարմինը Բաղրամյան 26-ն է կամ դրան մոտ կանգնած ինչ-որ անձինք»: «Երկիր Ծիրանի» խմբակցության ղեկավարը հավելեց նաև, որ մեր երկրում գործող բոլոր օրենքները զուրկ են մարդկանց համար հավասար պայմաններ ստեղծելուց: Հայաստանում այսօր, բանախոսի հավաստմամբ, հնչում է դժոխքի երաժշտություն, որը ներթափանցել է բոլոր բնագավառներում, իսկ այս ամենից ազատվել կարելի է միայն համազգային ընդվզման միջոցով: ««Դեպի Արարատ» կարգախոսով հունվարի երկրորդ կեսից սկսելու ենք համազգային ընդվզման գործընթացը՝ այցելելով ՀՀ բոլոր քաղաքներ նաև ԼՂՀ և Ջավախք»,- եզրափակեց Զարուհի Փոստանջյանը: Քրիստինե Աղաբեկյան
Հետևեք մեզ Viber-ում
