Եթե Գալուստ Սահակյանը «Մերսեդես» քարոզի, դրա վաճառքի տեմպերը կարող են ընկնել. քաղաքագետ

Քաղտեխնոլոգ Վիգեն Հակոբյանն ասյօր լրագրողների հետ զրույցում նշեց, որ առաջին անգամ վերջին տարիների ընթացքում չեղան հետընտրական զարգացումներ, և տասնամյակներից հետո առաջին անգամ ընդդիմությունը չխոստացավ թեժ աշուն: «Բավականին շատ դեպքեր են եղել, որ նույն նախագահական ընտրություններից հետո այդ այլընտրանք կոչեցյալն ինքն էր գործարքի մեջ մտնում իշխանության հետ։ Եվ կարծես թե հասարակության ստվար զանգվածի մոտ արմատավորվել է այն կարծիքը, որ մեզ միջնորդներ պետք չեն իշխանության հետ փողային հարաբերությունների մեջ մտնելու համար։ Բնականաբար, պետք է մեղադրվեր հասարակությունը, որովհետև ընդդիմություն կոչվածը կամ այն ուժերը, որոնք դիրքավորվում են այդ դաշտում, պետք է բացատրեն իրենց պարտությունը՝ ինչ-ինչ պատճառաբանություններով»։ Խոսելով 2018թ. ապրիլին սպասվող փոփոխություննների մասին, նա ասաց, որ հանրապետականների մոտ խառնաշփոթ է առաջանում, երբ Կարեն Կարապետյանը հայտարարում է, որ ուզում է մնալ վարչապետի պաշտոնում. «Հետո էլ Գալուստ Սահակյանն է սկզբում քողարկված քարոզում, փորձում համոզել Սերժ Սարգսյանին, որ վարչապետ դառնա, իսկ վերջին շրջանում ոչ միայն Սերժ Սարգսյանի PR-ն է անում, այլ նաև փորձում է սև PR իրականացնել նրա հնարավոր մրցակից Կարեն Կարապետյանի դեմ: Սա բավականին անսովոր վիճակ է ՀՀԿ-ի համար: Նրանք մտածում են, որ առանց «շեֆի» հետ համաձայնեցնելու, դժվար թե, նման բան ասեր, իսկ  Գալուստ Սահակյանի ասածը բոլոր դեպքերում արջի ծառայություն է, քանի որ նրա ասածը ցանկացած դեպքում սև փիառ է: Եթե Գալուստ Սահակյանը Մերսեդես էլ քարոզի, Մերսեդեսի վաճառքները կարող են ընկնել, նա այդպիսի կերպար է»: