Քվեարկել է այնպես, ինչպես պահանջում է այսօրվա գործող բանակցային գործընթացը.Շարմազանով

«ՀՀ նախագահ Սերժ Սարգսյանին Վրաստանում ընդունում են ոչ միայն իբրև Հայաստանի Հանրապետության լիդեր, այլ՝ իբրև տարածաշրջանային անվտանգության : Մարդ, որն ամեն ինչ անում է ռեգիոնալ անվտանգության ու ռեգիոնալ կայունության ապահովման համար, սա, կարծում եմ, պետք է հպարտություն ներշնչի պետական մտածողություն ունեցող քաղաքացուն», -   լրագրողների հետ հանդիպմանն ասաց ՀՀԿ խոսնակ, ԱԺ փոխնախագահ Էդուարդ Շարմազանովը։ Այն, ինչ մամուլին տրամադրվել է նախագահի՝ Վրաստան կատարած այցի վերաբերյալ, բավական համապարփակ է ու ինքն այս պահին ավելին ասելու համար նպատակահարմարություն չի տեսնում,ասաց նա: «Ամեն ինչ նորմալ գնում է», - վստահեցրեց նա։ Շարմազանովը` խոսելով ՄԱԿ-ում ՀՀ քվեարկության և ԱՄՆ նախագահի սպառնալիքների մասին հայտարարեց. «Յուրաքանչյուր պետություն արտաքին քաղաքական դիվանագիտություն իրականացնելիս պարտավոր է առաջորդվել բացառապես իր պետական շահով: Երուսաղեմի հարցում ՀՀ-ն քվեարկել է այնպես, ինչպես պահանջում է այսօրվա գործող բանակցային գործընթացը, ՄԱԿ-ի ընդունած բանաձևերն ու ձևաչափերը, Երուսաղեմում հայկական պատրիարքարանի շահերի պահպանումն ու հայության շահը` չանել քայլեր, որոնք հավելյալ լարվածություն կմտցնեն Երուսաղեմում և որոնք դեմ կլինեն այն բանակցային տրամաբանությանը, որ ընդունել է ՄԱԿ-ը Երուսաղեմի հարցով»: Ըստ նրա` ինչպես աշխարհը չպետք է ընդունի ԵԱՀԿ ՄԽ ձևաչափին հակասող բանաձևեր, այնպես էլ այս դեպքում է: ԱԺ փոխնախագահը վստահեցրեց, որ հայ-ամերիկյան հարաբերություններն այս փուլում վերելքի վրա են, և մենք պետք է կարողանանք ամեն ինչ անել, որ այդ հարաբերությունները զարգանան: