«Հավատում ենք, որ արդար դատավարություն կլինի ու տղաները դուրս կգան». եկեղեցու դեմ պայքարին միացած Վազգեն Միրզախանյանը հավատացնում է, թե իրեն շատ է մտահոգում, որ Սրբազան Հայրերը կալանքի մեջ են

Եկեղեցու դեմ պայքարին միացած Վազգեն արքեպիսկոպոս Միրզախանյանը հավատացնում է, թե իրեն շատ է մտահոգում, որ չորս Սրբազան Հայրեր այսօր կալանքի մեջ են։

«Շատ է մտահոգում, իրենք մեր հոգևոր եղբայրներն ու ընկերներն են, իրոք, ոչ միայն աղոթում ենք, այլ հավատում ենք, որ արդար դատավարություն կլինի ու տղաները դուրս կգան»,- լրագրողների հետ զրույցում ասաց նա։

Միրզախանյանը հայտարարեց, թե շատ շնորհակալ են Նիկոլ Փաշինյանին, որ «այնքան ազնիվ գտնվեց, որ այն հարցերը, որոնք տարիներով գոյություն ունեին, բարձրաձայնեց»։

«Մենք իր աջակցությունն ենք ստացել»,- ասաց եկեղեցու դեմ պայքարին միացած Միրզախանյանը։

Նա վստահեցրեց, թե, իբր, միշտ եկեղեցու ներսում խոսել են խնդիրների մասին։ Ըստ նրա՝ իրենց շատ եկեղեցականներ են միացել, ուղղակի կաշկանդվում են, որ իրենց անունը հայտնի դառնա։