Սուրբ Գրիգոր Լուսավորիչ ԲԿ-ն հրաժարվել է ընդունել հիվանդին, նա մահացել է տանը

Մեր օրերում, ցավոք, լինում են դեպքեր, երբ բուժաշխատողները մոռանում են իրենց երդումը՝ խաղալով մարդկային կյանքերի հետ։ Օրեր առաջ նման դեպք է տեղի ունեցել Երեւանում՝ պատճառով դառնալով երիտասարդ կնոջ մահվան։ «Փաստինֆո»-ի հաղորդմամբ՝ երիտասարդ կինը ունեցել է երիկամային անբավարարություն ու ծանր վիճակով շտապօգնությունը տեղափոխել է «Սուրբ Գրիգոր Լուսավորիչ ԲԿ», որտեղ նախկինում բուժօգնություն է ստացել, սակայն այստեղ հրաժարվել են հոսպիտալացնել՝ պատճառաբանելով, թե տեղ չունեն, որի հետեւանքով հիվանդը գնացել է տուն ու մահացել։

«Փաստինֆո»-ն կապ է հաստատել Գրիգոր Լուսավորիչ ԲԿ-ի հետ՝ դեպքի վերաբերյալ մեկնաբանություն ստանալու համար, որտեղից պնդեցին, թե հիվանդանոցը երբևէ չի մերժում։ Մերժում է միայն այն դեպքերում, եթե համապատասխան ծառայություն կամ բժիշկ չունի, մնացածը ամբողջությամբ կարգավորվում է իրավական ակտերով։ Այսինքն՝ կամայական որևէ բան տեղի չի ունենում։

Փաստն այն է, որ հիվանդին չեն ընդունել, փաստն այն է, որ հիվանդը մահացել է, փաստն այն է, որ բուժաշխաղոները, այդ թվում՝ շտապօգնության, իրենց թույլ են տվել բուժաշխատողին ոչ հարիր, այդ թվում կոպիտ վարքագիծ, իսկ հետո էլ ասում են, թե ինչու են բուժաշխատողների նկատմամբ, մասնավորապես, կանչերի դեպքում, քաղաքացիները կոպիտ լինում։ Բռնությունն ամենեւին չենք արդարացնում, սակայն առողջապահության նախարարությունը մտածելու շատ բան ունի՝ բուժանձնակազմին թերեւս պետք է վարքականոն սովորեցնել։

Մահացած հիվանդի անունը չենք հրապարակում անհատական տվյալների պաշտպանությունը կարեւորելով։ Առավել եւս, երբ նյութի նպատակն է՝ ԱՆ-ի ուշադրությունը հրավիրել երեւույի վրա, ինչը բացառիկ դեպք չէ։