«Դատախազությունն անգործության է մատնված»․ Փաշինյանի դեմ ներկայացված հաղորդման հետքերով․ փաստաբան. 24news.am

Մի շարք հասարակական կազմակերպություններ, ԶԼՄ ներկայացուցիչներ, կուսակցություններ երեկ՝ նոյեմբերի 24-ին, հաղորդում են ներկայացրել դատախազությանը Փաշինյանի կողմից Եկեղեցու և քաղաքացիների իրավունքների խախտման վերաբերյալ։

24Nwes-ը փաստաբան Արմինե Ֆանյանի հետ զրուցել է վերոնշյալ գործընթացների, Հայաստանում հիմնարար իրավունքների խախտումների մասին։

Ըստ նրա՝ պետության կողմից իրականացվող քաղաքականությունը, որը հիմնականում մի շարք ոլորտներում դրսևորվում է մարդու հիմնական իրավունքների և ազատությունների սահմանափակմամբ, վերջին, հատկապես մեկ տարվա ընթացքում, ընդգծված բիրտ քաղաքականություն է։

«Եկեղեցու մեջ ներքին պառակտում մտցնելու քաղաքականություն է որդեգրել պետությունը։ Գիտեք հայտնի ասացվածքը․ «Բաժանիր, որ տիրես», և այդ կերպ իշխանությունը փորձում է այս երկրի հերթական ամենաուժեղ հենասյուներից մեկից ազատվել։ Տեսաք՝ բանակը լուծարվեց, կարելի է ասել՝ բանակ չունենք։ Եկեղեցին այս եղանակով փորձում են պառակտել և ոչնչացնել։ Բոլոր տեսակի հենասյուները ոչնչացնելու քաղաքականություն է վարվում, դա իմ գնահատականն է իբրև ՀՀ քաղաքացի»,-նշեց նա։

Անդրադառնալով երեկ դատախազությանը ներկայացված հաղորդմանը՝ նա նշեց, որ նմանատիպ հաղորդում ավելի վաղ ներկայացվել էր փաստաբան Արա Զոհրաբյանի կողմից։

«Երբ Նիկոլ Փաշինյանը հայտնեց, որ մասնակցելու է կարգալույծ եղած Ստեփան Ասատրյանի մատուցած պատարագին, այդ ժամանակ հանցագործության նախապատրաստության մասին հաղորդում ներկայացվեց։ Հաջորդիվ, երբ խոչընդոտվեց իրական պատարագ մատուցողի մուտքը Եկեղեցի, դրա հետ կապված ևս հաղորդում ներկայացվեց հանցագործության մասին՝ արդեն որպես ավարտված հանցագործություն։ Վարույթի նախաձեռնումը մերժվեց՝ պատճառաբանելով, որ դա ուղղված չէ ո՛չ վարչապետի գործողություններին, ո՛չ էլ այդտեղ գտնվող անձանց, ոքվեր խոչընդոտեցին մարդկանց ազատ տեղաշարժը։ Նաև խոչընդոտվեց ծեսը, որն ինքնին հանցագործություն է։ Պետությունն այնպիսի քաղաքականություն որդեգրեց, որ ամեն ինչ նորմալ է, ոչինչ էլ տեղի չի ունեցել, ձեր ազատ տեղաշարժը չի խոչընդոտվել»,-ասաց Արմինե Ֆանյանը։

Փաստաբանն ասում է՝ արդեն կա պրակտիկա, որ նման հաղորդումները որևէ ընթացք չեն ստանում և մտահոգություն հայտնում, որ այս հաղորդումն էլ նույն ճակատագրին է արժանանալու։

Նա ասաց, որ մինչև վերջ պայքարելու են, որպեսզի վարույթ նախաձեռնվի և արդեն բողոքարկել են։

«Այն ՀԿ-ները և անձինք, ովքեր ներկայացրել են այդ հաղորդումը, ստիպված են լիելու դեռ երկար ճաապարհ անցնել, որպեսզի բերեն իրավասու մարմիններին նրան, որ առերևույթ հանցանքի մասին հաղորդում է ներկայացվել, նրանք պարտավոր են վարույթ նախաձեռնել»,-ասաց փաստաբան Արմինե Ֆանյանը։

Նրա գնահատմամբ, իրավական գործընթաց չկա, այլ ամբողջությամբ թողտվություն է, և պետությունը վերջին շրջանում որևէ աղերս չունի իրավական գործընթացքի հետ․ «Խոսքը վերաբերում է որոշակի զգայնություն ունեցող գործերին, ուղղակի պատ է, որտեղ ուզում ես բողոքարկիր։ Բոլոր զգայուն գործերը մակագրվում են կալանք տվող դատավորներին, ովքեր ճակատին խարան ունեն, որ իրենք քաղբանտարկյալ կերտող են կամ անմեղ անձանց կալանավորող։ Դատախազությունը բացարձակ անգործության է տրված, եթե իրենց պետք չի, որ վարույթ նախաձեռնվի, ինչքան ուզում է՝ առերևույթ հանցանքի մասին հաղորդում ներկայացվի, ոչ մի պարագայում վարույթ չի նախաձեռնվում, ուր ուզում ես՝ բողոքարկիր, պատի ես հանդիպում»։

Նա ասում է, որ քաղաքական ցանկացած ակտիվություն ողջունում է և ամենամեծ հանցանքը համարում է լռությունն ու անտարբերությունը։

«Լռությունն անընդունելի է, հատկապես այսօր տեղի ունեցող զարգացումների ֆոնին։ Այն քաղաքականությունը, որը վարվում է Հայ Առաքելական Սուրբ եկեղեցու դեմ, դա յուրաքանչյուրիս դեմ մղվող պատերազմ է, և չգործել, սպասել, տեսնել, թե ի՞նչ է լինելու առաջիկա ընտրություններին, դա հանցավոր անգործություն է։ Դրա համար ցանկացած այդ տեսակ նախաձեռնություն ողջունում եմ, իհարկե, բայց այդ նախաձեռնությանը հետևողականորեն պետք է տեր կանգնեն և ոչ թե բավարարվեն՝ դատախազության բացասական արձագանքը ստանալով»,-նշեց փաստաբանը։

Արմինե Ֆանյանն ասում է, որ այսօր Հայաստանի Հանրապետությունում սահմանադրական կարգ գոյություն չունի՝ տապալված է։

Հասմիկ Սարգսյան