Խուճապային իրավիճակ Հայաստանում

«Իրազեկ և պաշտպանված սպառող» հասարակական կազմակերպության նախագահ Բաբկեն Պիպոյանն այսօր հայտարարեց, որ երկրում ստեղծվել է խուճապային իրավիճակ՝ մարդիկ առևտուր անելուց վախենում են հին ապրանք գնել՝ նորի փոխարեն:  «Պանիկան հասել է այնպիսի մակարդակի, որ մարդիկ լարվածության մեջ են։ Ամենավատն այն է, որ երեկ ռեպորտաժ էի նայում, որտեղ լրագրողի հարցին ի պատասխան, թե ինչպես մարդը տարբերի ավանակի և ձիու միսը՝ տավարի մսից, լիազոր մարմնից պատասխանում են, թե հալման ջերմաստիճանում ձեռքի շոշափումով կարելի է տարբերել։ Նման բան չկա, նման բան հանրապետության մեջ մեկ-երկու ստաժավոր անասնաբույժ կարող են անել, որոնք իրենց ձեռքի ջերմաստիճանն անգիր գիտեն, կարող են այս հալման փորձի մեթոդաբանությունն անել։ Սա լաբորատոր փորձաքննությամբ է միան պարզվում։ Տան պայմաններում դրանք իրարից տարանջատելն անհնարին է»։ Պիպոյանն օրինակ բերեց՝ վերջերս անցկացված հավի մսի մոնիտորինգը, նշելով, որ ոչ թե ՍԱՊԾ-ն, այլ այս անգամ՝ արդեն Ոստիկանությունը պարզեց, որ մսի շուկայում իրացվում է ավանակի և ձիու միս. «Նորից գնացին Ոստիկանության արած աշխատանքի հետքերով՝ նորից  փորձելով վերագրել, թե սա իրենց կողմից կատարվող աշխատանք է։ Այնինչ, եթե հավի մսի շուկայում նմուշառման խնդիրներ կային, պարզելու համար՝ ինչպիսին է այն, մսամթերքի շուկայում այդ խնդիրները բացահայտելը շատ ավելի հեշտ է։ Վերահսկողություն է իրականացվում, առաջին հերթին՝ ուղեկցվող փաստաթղթերի նկատմամբ, և առնվազն հանրապետության տարածքի որոշ մասում անասնաբուժասանիտարական փորձաքննությունն իրականացնում է հենց լիազոր մարմնի ենթակայությամբ գործող լաբորատորիան։ Այսինքն՝ կամա թե ակամա, ամեն օր իրենք տեսնում են շուկայում իրացվող մսեղենը։ Բայց մի քանի օր անց նոր տեսնում ենք, որ շուկայում հայտնվել է ավանակի միս։ Ավելին, մարզերից ասում են, որ քանի որ այս տարի խոտի խնդիր ունեն, որոշ գյուղացիներ մորթում են անգամ փոքր ավանակներին և ձիերին, որովհետև չեն կարողանում պահել նրանց»։