Համատարած գնաճի ֆոնին պայթում է իշխանության խոստացած «լավ ապրելու» առասպելը. պատգամավոր

ՀՅԴ Տավուշի Մարզային կոմիտեի ներկայացուցիչ, ՀՀ ԱԺ «Հայաստան» խմբակցության պատգամավոր Գառնիկ Դանիելյանը գրում է.

«Հայաստանում օր օրի նկատելի են դառնում գնաճի ահագնացող տեմպերը։ Մեր հայրենակիցներն ահազանգում են, որ հատկապես առաջնային անհրաժեշտության ապրանքների դեպքում նկատում են զգալի թանկացում։ Ակնհայտ է, որ չավելացող եկամուտների պարագայում թանկացումները բացասաբար են անդրադառնում մեր բնակչության կյանքի որակի վրա։

Հայաստանի վիճակագրական կոմիտեի հրապարակած 2025թ․-ի սպառողական գների ցուցանիշները ևս փաստում են գնաճի մասին։

Հայաստանում 2024 թվականի սեպտեմբերի համեմատ 12-ամսյա գնաճը կազմել է 3.7%։

Սննդամթերքի և ոչ ալկոհոլային խմիչքների գները աճել են 5.8%-ով։

Էականորեն թանկացել են մսամթերքը, կաթնամթերքը, կարագը, արևածաղկի բուսական յուղը, շոկոլադը, պաղպաղակը, ծխախոտային արտադրատեսակները։

Որոշ ապրանքատեսակներ թանկացել են կրկնակի։ Չմոռանանք նաև, որ թանկացում ունենք նաև վառելիքի, ուղեվարձի, մի շարք ծառայությունների պարագայում։

Քանի դեռ իշխանությունները հսկայական գումարներ են վատնում իրենց կյանքն ավելի բարեկեցիկ դարձնելու և հասարակությանը զանազան շոուներով զվարճացնելու վրա, միայն վատթարանում է քաղաքացիների սոցիալական դրությունը։ Պայթում է «լավ ապրելու» առասպելը, որ խոստանում են սրանք արդեն 7 տարի։

Փոխարենը՝ ամենուրեք թանկացումներ և հարկային հսկայական բեռ։ Արդարացումն էլ կա՝ «աղքատությունը ձեր գլխում է»»։