Ուզում եմ իմանալ՝ ինքն այնտեղ ի՞նչ կարգավիճակով է եղել՝ օկուպանտի՞, ագրեսորի՞, թե՞ ռազմական հանցագործի. Ղազարյանը՝ Ռուբինյանի մասին

Հանրային գործիչ Էդգար Ղազարյանն այլեւս չի ակնկալում, որ ՀՀ ԱԺ փոխնախագահ Ռուբեն Ռուբինյանն իրեն կընդունի։ Այսօր տեղի ունեցած ճեպազրույցում գործիչը նշել է, որ ԱԺ աշխատակազմից հեռախոսազանգի միջոցով իրեն տեղեկացրել են, որ Ռուբեն Ռուբինյանը չի պատրաստվում իրեն ընդունել։

Նշենք, որ նա այսօր անգամ գնացել էր ԱԺ՝ քաղաքացիների ընդունելության ձեւաչափով հանդիպման համար։

«Կրկին շատ հստակ ասում են՝ միայն Ձեզ, պարոն Ղազարյան, նպատակահարմար չի գտնում ընդունել։ Ես հարցնում եմ՝ ուրիշ քաղաքացիներ կա՞ն գրանցված ընդունելության համար, ասում են, որ այո, ուրիշ քաղաքացիներ կան, նրանց հետ ընդունելությունը կայանալու է, չի լինելու միայն Ձեզ հետ։ Պարզ ու հստակ ասում են, որ դա խտրական վերաբերմունք է՝ պայմանավորված քաղաքական հայացքներով։ Ես ՄԻՊ էլ եմ դիմել, ահազանգել, որ խտրականություն է»,- ասել է Է. Ղազարյանն՝ ավելացնելով, որ բողոքներ է հղել նաեւ իրավապահ մարմիններին, որոնք վարույթներ չեն նախաձեռնել։

 Վերջինս խնդրանքով դիմեց նաև ՀՀ ԱԺ ընդդիմադիր խմբակցությունների պատգամավորներին, որպեսզի վերջիններս վաղը նույնպես գան ԱԺ, քանի որ կրկին սպասվում է քաղաքացիների ընդունելություն։

«Խնդրում եմ ԱԺ ընդդիմադիր խմբակցությունների բոլոր պատգամավորներին, որպեսզի վաղը ժամը 11-ին 30 հոգով գան այստեղ։ Կարգ կա չէ՞ ընդունելության, Էդգար Ղազարյանը խախտե՞լ է այդ կարգը։ Չէ՛, զանգել է, էլեկտրոնային փոստն ուղարկել է, գրանցվել է, ոչ մի բան չի խախտել։ Բա որ խախտում չի արել, ո՞նց չես ընդունում»,- նշել է նա։
Ղազարյանը նաև նշել է, որ ոչ միայն քննարկելու է վարչապետ Փաշինյանին անվստահություն հայտնելու հարցը, այլև՝ այլ հարցեր։

«Ես ասել եմ, որ այլ հարցեր էլ են լինելու։ Օրինակ ինձ հետաքրքրում է Ռուբեն Ռուբինյանի կարգավիճակը ՀՀ և ԱՀ միջխորհրդարանական հանձնաժողովի կազմում, նա այդ հանձնաժողովի անդամ է։ Ինձ հետաքրքիր է, նա որպես այդ հանձնաժողովի անդամ ի՞նչ գործունեություն է վարել մինչև հիմա, առաջիկայում ի՞նչ գործունեություն է պատրաստվում վարել։ Ինքը համարվում է հայ-թուրքական գործընթացում հայկական կողմի պաշտոնական ներկայացուցիչ։ Ինձ հետաքրքիր է նրա իրավական կարգավիճակը, նրա գործողություններն այդ առումով։ Ինքը եղել է

2016 թվականի մայիսին Արցախի պաշտպանության բանակում «ՔՊ»-ի կամավորական ջոկատի անդամ, Մարտակերտի շրջանում ՊԲ զորամասից մեկում իրականացրել է մարտական առաջադրանք, զենքով, հայկական բանակի զինվորական համազգեստով։ Ես ուզում եմ իմանալ՝ ինքն այնտեղ ի՞նչ կարգավիճակով է եղել՝ օկուպանտի՞, ագրեսորի՞, թե՞ ռազմական հանցագործի»,- ասել է նա։