Հացադուլավորները ուղղորդվում են, և այդ հացադուլի մեջ այլևս որևէ ինքնաբուխ բան չկա. ԵՊՀ ռեկտոր
«Ուսանողների կողմից կրկին հայտարարված հացադուլը ուղղորդված է։ Նրանք երեկ չէ առաջին օրն են եկել Լեհաստանից, Սոուսի հայտնի համաժողովից, բնականաբար, երևի ինչ-որ առաջադրանքներ են ստացել ու առավոտյան եկել, մտել են լսարան ու հացադուլ են անում: Մենք չենք խանգարում իրենց», — «Ազատության» եթերում ասաց ԵՊՀ ռեկտոր Արամ Սիմոնյանը: «Գիտեք ինչ, ժամանակավրեպ բան է, այդքան հանդիպումներ եղան, այդքան քննարկումներ ու բացատրություններ եղան, ես կարծում եմ, որ այս քայլը ժամանակավրեպ քայլ է և բացարձակ որևէ դրական հետևանք չի կարող ունենալ ինչ-որ խնդիրների լուծման համար: Ուսանող են իրավունք ունեն մտնել լսարան, լինել լսարանում , իսկ մենք ոչինչ չենք պատրաստվում անել », — ասաց ԵՊՀ ռեկտորը։ Ռեկտորի կարծիքով, ուսանողությունն անտարբեր կգտնվի հացադուլ հայտարարած ուսանողների երկրորդ քայլին։ «Իրենք սխալ ճանապարհ են ընտրել և այն, ինչ իրենք քարոզում են կամ ինչ իրենք մտադրվել են անել, դա չի բխում մեր ժողովրդի ու գիտության զարգացման շահերից», — նշեց Ա. Սիմոնյանը։ Նա ընդգծեց, թե ուսանողներն իրենց այս շարժումը փորձում են քաղաքականացնել.«իմ անձնական կարծիքն է, որ նրանք ուղղորդվում են, և այդ հացադուլի մեջ այլևս որևէ ինքնաբուխ բան չկա»,-նշեց Սիմոնյանը, հավելելով, որ համոզված է, որ քաղաքական ապակայուն իրավիճակ են փորձում ստեղծել:
Հետևեք մեզ Viber-ում
