Բաքվում շարունակվում է ապօրինաբար պահվող հայ գերիների դատավարությունը

Բաքվում շարունակվում է ապօրինաբար պահվող հայ գերիների դատավարությունը։

Այսօր, ըստ ադրբեջանական ԶԼՄ-ների, դատավարության ընթացքում հրապարակվել են «քրեական գործերով ընդհանուր տեղեկություններ»: Մասնավորապես, նշվում է, որ Հայաստանի պաշտպանության նախկին նախարար Դավիթ Տոնոյանի հանձնարարականով Արցախի նախագահ Արայիկ Հարությունյանը հանդես է եկել հայտարարությամբ, որ Գանձակի այսպես կոչված գնդակոծությունն իրականացվել է ոչ թե Հայաստանի տարածքից, այլ իր հրամանով՝ Արցախի տարածքից։

Մեկ այլ փաստաթղթի համաձայն՝ արտացոլված են տեղեկություններ 7 ապօրինաբար պահվող գերիների՝ Արկադի Ղուկասյանի, Բակո Սահակյանի, Արայիկ Հարությունյանի, Լևոն Մնացականյանի, Դավիթ Բաբայանի, Դավիթ Իշխանյանի, Դավիթ Մանուկյանի մասին, այդ թվում՝ 1990-ականների սկզբից նրանց պաշտոնները, 2016 թվականի ապրիլյան մարտերին, 2020 թվականի 44-օրյա պատերազմին նրանց մասնակցությունը։