54 մլն 608 հազար դրամի վարկային պարտավորություն՝ 7 մլն 22 հազար դրամ եկամտի պարագայում, ինչ է հայտարարագրել Վաղարշապատում ՔՊ-ի թեկնածուն

Նոյեմբերի 16-ին Վաղարշապատում կայանալիք ընտրություններում «Քաղաքացիական պայմանագրի» նախընտրական ցուցակը կգլխավորի Արցախյան առաջին ազատամարտի հերոս Մեխակ Մեխակյանի որդին՝ Արգիշտի Մեխակյանը։

«Փաստինֆոն» ուսումնասիրել է Մեխակյանի հայտարարագիրը։ Ըստ այդմ՝ նա հայտարարագրել է Վաղարշապատում գտնվող անհատական բնակելի տունը՝ իր տնտեսական շինություններով, ինչպես նաև 2019 թ-ին ձեռք բերած 2018 թ-ի արտադրության TOYOTA մակնիշի ավտոմեքենան։

Մեխակյանը նաև հայտարարագրել է բազմաբնակարան շենքերի համալիրների կառուցման մեջ մասնագիտացված «Արկադա Քոնսթրաքշն» ՍՊԸ-ին հանձնած 42 մլն դրամի փոխառությունը, ինչին զուգահեռ ունի նաեւ բավական մեծ վարկային պարտավորություն։

2024թ-ի վերջերին այն կազմել են 54 մլն 608 հազար դրամ, սա այն դեպքում, երբ 2024 թ-ին նա հայտարարագրել է միայն 7 մլն 22 հազար դրամ եկամուտ, որից 6 մլն 93 հազար դրամը Խոյ համայնքի ղեկավարի պաշտոնում ստացած աշխատավարձն է, իսկ 928 հազար դրամը՝ Արմավիրի մարզպետի պաշտոնում ստացած աշխավարձը։

Վարկերի մարմանը 2024-ին նա ուղղել է 3 մլն 784 հազար դրամ։ Մտացվում է՝ մեկ տարի նա ապրել է 3,5 մլն դրամով ու դեռ 800.000 էլ խնայել։

Տարեվերջին նրա բանկային հաշվի մնացորդը կազմել է 384 հազար դրամ, իսկ տնօրինած կանխիկ միջոցները՝ 500 հազար դրամ։