Զոհված զինծառայողների ծնողները կքննարկեն Իշխան Վահանյանի վճռի դեմ բողոք ներկայացնելու հարցը

Զոհված զինծառայողների ծնողները կքննարկեն՝ Ջրականի 5-րդ ուսումնական գումարտակի հրամանատար Իշխան Վահանյանի վճռի դեմ բողոք ներկայացնելու հարցը։

Ինչպես արդեն տեղեկացրել ենք՝ Երևանի ընդհանուր իրավասության քրեական դատարանը՝ դատավոր Ջոն Հայրապետյանի նախագահությամբ, հրապարակել է վճիռը, համաձայն որի՝ Վահանյանը մեղավոր ճանաչվեց ՀՀ քրեական գործող օրենսգրքի 546-րդ հոդվածի 1-ին մասով և 549-րդ հոդվածի 3-րդ մասով, Վահանյանի նկատմամբ որպես պատիժ նշանակվեց ազատազրկումը՝ 16 տարի ժամկետով։ Հաշվանցվեց կալանքի տակ գտնվելու ժամանակն ու վերջնական պատիժ նշանակվեց 11 տարի և 10 ամիս։ Վահանյանի նկատմամբ լրացուցիչ պատիժ նշանակվեց մայորի զինվորական կոչումից զրկվելը։

Զոհված զինծառայողների ծնողները, որոնք պահանջում էին Վահանյանին դատապարտել ավելի քան 20 տարվա ազատազրկման, մտադիր են բողոքարկել վճիռը։ Տուժողների իրավահաջորդների ներկայացուցիչ Գայանե Հովակիմյանը «Փաստինֆո»-ի հետ զրույցում ասաց, որ վճռին ամբողջությամբ ծանոթանալուց հետո կքննարկվի բողոք ներկայացնելու հարցը։ Տուժող կողմի ներկայացուցիչ Գուրգեն Գրիգորյանն էլ ավելացրեց, որ չնայած հանրային մեղադրողի՝ դատարանում աշխատանքից դժգոհություն չկա, բայց նախաքննությունն իրականում թերի է եղել, քանի որ կան անձինք, որոնք պետք է լինեին մեղադրյալի կարգավիճակում, ինչպես նաև՝ Իշխան Վահանյանին՝ մեկ այլ գործողության վերաբերյալ ևս պետք է մեղադրյալի կարգավիճակ տրվեր, վաղեմության ժամկետներն էլ հոսում են։

Հիշեցնենք, որ Իշխան Վահանյանին մեղադրանք է առաջադրվել ՀՀ քրեական օրենսգրքի 356-րդ հոդվածի (հրամանը չկատարելը) 3-րդ մասով և 380-րդ հոդվածի (մարտադաշտն ինքնակամ լքելը կամ զենքով գործելուց հրաժարվելը) 1-ին մասով: Նրա նկատմամբ որպես խափանման միջոց էր ընտրվել կալանավորումը։ Ըստ ՔԿ-ի՝ Վահանյանը, Ադրբեջանի Հանրապետության կողմից Արցախի Հանրապետության դեմ սանձազերծված ագրեսիվ պատերազմի և 2020թ. սեպտեմբերի 27-ին հայտարարված ռազմական դրության ժամանակ զբաղեցնելով ԱՀ պաշտպանության բանակի զորամասերից մեկի ուսումնական գումարտակի հրամանատարի պաշտոնը, հանդիսանալով իր ենթակա անձնակազմի պետը, մարտական գործողությունների ընթացքում չի կատարել իր անմիջական պետի հրամանը, ինչպես նաև ինքնակամ լքել է մարտադաշտը, որի արդյունքում զորամասի ուսումնական գումարտակի անձնակազմից զոհվել, տարբեր աստիճանի մարմնական վնասվածքներ են ստացել և գերեվարվել պարտադիր ժամկետային զինծառայողներ՝ այդ կերպ առաջացնելով ծանր հետևանքներ: Ըստ քրեական գործի՝ զոհվել է առնվազն 16 զինծառայող, վիրավորվել՝ 6-ը, գերեվարվել՝ 7-ը։ Այս գործով անցնող միակ մեղադրյալը Իշխան Վահանյանն է։

Աղբյուր՝ Փաստինֆո
Հեղինակ՝ Իզաբել Սահակյան