Երբ տունը դարձել է սպառնալիք․ Գյումրիի վթարային շենքերի ամրացման համար դարձյալ գումար չի հատկացվել (video)

Գյումրի քաղաքի Հանեսօղլյան 5 հասցեում գտնվող բազմաբնակարան շենքը Կումայրի արգելոցի տարածքում է գտնվում։ Այն քաղաքի առավել վթարային բազմաբնակարան շենքերից մեկն է․ դեռևս 6 տարի առաջ գնահատվել էր որպես 4-րդ աստիճանի վթարայնության շենք, այսինքն՝ քանդման ենթակա։ Բայց այն ոչ միայն չի քանդվել, այլև բնակիչները մինչ օրս շենքից չեն տարհանվել և շարունակում են սեփական ուժերով պահել այն։

16 բնակարան ունեցող շենքի 2 ճակատային հատվածները փլուզվել էին 1988 թվականի երկրաշարժի ժամանակ։ Հիմա շենքում 11 ընտանիք է ապրում, այդ թվում նաև երեխաներ։
Երկրաբանա-հանքաբանական գիտությունների դոկտոր-պրոֆեսոր Սերգեյ Նազարեթյանը գնահատել է շենքի վտանգավորությունն ու հաստատել, որ բնակելիի ծայրամասային մի հատվածը թույլ ցնցումներից անգամ փլուզվելու վտանգի տակ է։

Իսկ կառավարությունում շարունակում են անտեսել այս խնդիրը։ 22 տարի է, պետական բյուջեից միջոցներ չեն հատկացվել Գյումրիում երկրաշարժից վթարային դարձած շենքերի ամրացմանն ու վնասազերծմանը։