Չենք կարծում՝ սա իրական արդարադատության հարթակ է, եթե դատավորը խնդիր չունենար, Միքայել Սրբազանի գործը կուղարկեր Շիրակի մարզի դատարան. փաստաբան
Պաշտպանության կողմը բոլոր հնարավոր քայլերը կատարեց, բոլոր ջանքերը գործադրեց, նույնիսկ այս միակողմանի դարպասի պայմանում, որ ցույց տա Միքայել Սրբազանի անմեղությունը: Այս մասին Միքայել Սրբազանի դատական նիստից հետո լրագրողների հետ զրույցում ասաց Սրբազանի փաստաբաններից Արա Զոհրաբյանը:
«Բայց ինչպես արդեն լսեցիք մեր վատատես փաստարկները, մենք չենք կարծում, որ սա իրական արդարադատության հարթակ է, որովհետև հակառակ դեպքում մենք կունենայինք նշաններ, որ դատավորը կարող էր ցույց տալ:
Ամենառաջին իսկ քայլով ընդատության կուղարկեր: Եթե դատավորը խնդիր չունենար, նա գործը կուղարկեր Շիրակի մարզի դատարան: Այդ քայլը չանելով՝ արդեն պարզ է, որ այս գործը ինքը պետք է քննի, ինքը պետք է դատական ակտը կայացնի»,- ասաց փաստաբանը:
Զոհրաբյանը նշեց, որ դատարաններում կան դատավորներ, որոնք փաստաբանների շրջանում ունեն մեղադրական հակում ունեցող համբավ, և, ըստ նրա, Արմինե Մելիքսեթյանն այդ շարքում է գտնվում:
«Ամենակարևորը ոչ թե պետք է գար Երևանի դատարան, այլ գնար Շիրակի մարզի դատարան, մյուս կարևոր բանը, որ նույնպես խոսում է այն մասին, որ մեղադրական վերդիկտի նախանշաններ կան, դա այն է, որ Արմինե Մելքսիեթյանը, դատելով նրա կենսագրությունից և քննած գործերի վիճակագրությունից, ժամանակագրությունից, արագ գործեր քննող չէ:
Նա նիստերը նշանակում էր բավականին ուշ, բայց այս դեպքում տեսնում ենք մեկ շաբաթում 2-3 նիստ էր նշանակում, փորձում էր արագ ավարտել: Սա էլ է խոսում այն մասին, որ ուզում է հապշտապ որոշում կայացնել»,- ասաց նա:
Հետևեք մեզ Viber-ում
