Դավիթ Փափազյանը գուցե միայն «երեսն» է, այսինքն գրառման դեմքը, իսկ խորքում այլ շերտեր են. Հակոբ Բադալյան

Հակոբ Բադալյանը գրում է. «ԱՆԻՖ նախկին գործադիր տնօրեն Դավիթ Փափազյանը, որ Հայաստանի նախկկին արտգործնախարար Վահան Փափազյանի որդին եւ ասում են նաեւ՝ նախկին նախագահ Արմեն Սարգսյանի սանիկն է, քննադատել է Նիկոլ Փաշինյանին:

«Չի հաջողվելու մեզ մեղավոր կարգել` իր և իր կառավարության խայտառակ սխալների և թերությունների համար, որոնք խափանեցին ԱՆԻՖ-ի հիմնադիր թիմի մշակած ծրագրերից մի քանիսը», գրել է Դավիթ Փափազյանը:

Սա իհարկե շատ ուշագրավ, եւ հնարավոր է բավականին բազմաշերտ մոտիվներ ունեցող գրառում է, որտեղ Դավիթ Փափազյանը գուցե միայն «երեսն» է, այսինքն գրառման դեմքը, իսկ խորքում այլ շերտեր են:

Ի դեպ, աստեղ գուցե ավելորդ չէ հիշեցնել մի բան, որ Դավիթ Փափազյանը վերջերս հայտնվեց Գազայի հետ կապված աղմկոտ պատմության մեջ:

Հետքը օգոստոսին գրել էր, որ Մեծ Բրիտանիայում գործող Մարդու իրավունքների արաբական կազմակերպությունը (Arab Organization for Human Rights, AOHR) բողոք է ներկայացրել ՀՀ գլխավոր դատախազին՝ ընդդեմ Հայաստանի քաղաքացի Դավիթ Փափազյանի:

Ըստ այդ տեղեկության, իրավապաշտպան կազմակերպությունը գլխավոր դատախազ Աննա Վարդապետյանին կոչ է արել անհապաղ հետաքննություն սկսել Փափազյանի նկատմամբ, որը, ըստ առկա տեղեկությունների, Գազայի մարդասիրական հիմնադրամի (Gaza Humanitarian Foundation, GHF) խորհրդի նախագահն է:
Middleeasteye.net-ի լրագրողը նշել է, որ տեսել է մի շարք նամակներ, որոնց մեջ AOHR-ը գրել է, թե կան «հավաստի ապացույցներ եւ փաստաթղթեր» առ այն, որ Դավիթ Փափազյանը «կարող է ներգրավված լինել կամ նպաստել է Գազայի հատվածում այնպիսի գործողությունների, որոնք համարժեք են ռազմական եւ մարդկության դեմ հանցագործությունների»:

Սեպտեմբերի 5-ին եղավ տեղեկություն, որ Քննչական կոմիտեն հանձնարարել է Դավիթ Փափազյանի նկատմամբ հայտարարել միջազգային հետախուզում, իսկ նրա նկատմամբ խափանման միջոց է ընտրվել կալանքը:

Արդյո՞ք այս հանգամանքն է, որ Փափազյանին «հանել» է Փաշինյանի դեմ, թե՞ այս հանգամանքը այն է, ինչ օգտագործվում է, իսկ դրա ներքո առկա են ավելի լայն եւ խորը քաղաքական մոտիվներ: Այլ կերպ ասած՝ Փափազյանն այս դեպքում զինվորն է, իսկ ֆուգուրները՝ այլք:

Համենայն դեպս կարող է լինել նախընտրական Հայաստանի շատ հետաքրքիր մի շերտ»: