Նիկոլն իր դավաճանության մեղավոր է նշանակում հայ մայրերին. Արեգնազ Մանուկյան

«Մայր Հայաստան» կուսակցության վարչության անդամ Արեգնազ Մանուկյանի ելույթը կուսակցության համագումարում։

***

Հարգելի՛ քաղաքացիներ, սիրելի՛ գործընկերներ,

«Մայր Հայաստան» կուսակցությունը ստեղծվում է մեր երկրի համար վճռորոշ ժամանակահատվածում: Համոզված եմ, որ կուսակցությունը կարևոր դերակատարում է ունենալու մեր քաղաքական կյանքում:

Եկել է քարերը հավաքելու պահը: Դրված է լինել-չլինելու խնդիր: Բոլորս պետք է հնարավորն ու անհնարն անենք, որպեսզի մեր երկրում քաղաքական փոփոխություն՝ իշխանափոխություն լինի, ձևավորվի ազգային նոր իշխանություն:

Մենք պետք է ձերբազատվենք ու պատմության աղբանո՛ցն ուղարկենք փողոցից պետական կաբինետներ տեղափոխված այն խմբակին, որը ժողովրդի արդարացի բողոքը և սպասումները շահարկելով, ժողովրդի զգացմունքների հետ խաղալով՝ իշխանական լծակների տեր դարձավ ու մեր երկիրը հասցրեց այս օրին: Դավաճանաբար հանձնվեց Արցախը, հանձնվեցին Հայաստանի տարածքները:

Զիջումներն անդադար են դարձել: Թուրքիայի ու Ադրբեջանի ախորժակն ուտելիս բացվել է: Հատկապես երբ դիմացը տեսնում են բացառապես սեփական շահեր հետապնդող մեկին:

Օրվա իշխանությունը հազարավոր զոհերի պատճառ դարձավ և մեծ ողբերգություն բերեց հայ ժողովրդի գլխին:

Նիկոլ Փաշինյանը պատերազմի, պարտության, ապիկարության, խաբեության խորհրդանիշն է:

Սրանք խոստացան սեր և համերաշխություն, բայց բերեցին ատելություն և պառակտեցին հանրությանը:

Խոստացան խաղաղություն, բայց բերեցին ու բերում են պատերազմ:

Խոստացան թալանի, կոռուպցիայի դեմ պայքար, բայց իրե՛նք դարձան «հեղափոխական» թալանչիներ, իսկ կոռուպցիայի դեմ պայքարը դարձրել են սեփականության գռեհիկ վերաբաշխման գործիք:

2018-ին սրանք արագաչափերն ու տեսախցիկներն իրենց ներքնաշորերով փակում էին՝ խոստանալով դրանց վերացում, բայց հիմա արագաչափերով, տեսախցիկներով, կարմիր կետագծերով ավտոկայանատեղիները թանկացնելով, քաղաքային տրանսպորտի գինն անհիմն ավելացնելով, գույքահարկը մեծացնելով, տեղական տուրքերն ու վճարները բարձրացնելով, աղբահանության համար ավելի գումար վերցնելով մինչև ներքնաշորը կլպում են իրենց կողմից հպարտ որակված քաղաքացուն:

Խոստացան, որ հոսանքի, գազի, ջրի գինն էժանացնելու են, բայց խաբեցին:

Ասում էին՝ Արցախը Հայաստան է, և վե՛րջ, հիմա Ալիևից ավելի մեծ էնտուզիազմով են Արցախն Ադրբեջանինը համարում:

2021-ի արտահերթ խորհրդարանական ընտրությունների ժամանակ խոստանում էին Արցախի ինքնորոշման իրավունքի պաշտպանություն, բայց 2022-ի հոկտեմբերի 6-ին դավաճանաբար հանձնեցին Արցախն ու հնարավորություն տվեցին Բաքվին իրականացնել հայերի էթնիկ զտումներ:

Ասում էին «Ապագա կա», բայց պարզվեց՝ նկատի ունեին թուրք-ադրբեջանակա՛ն օրակարգով ապագան:

Հիմա էլ «Խաղաղության խաչմերուկից» են խոսում, ինչը նշանակում է՝ նոր պատերազմ, նոր զիջումներ, նոր կորուստներ:

Սրանք Արարատի դեմ կռիվ են տալիս յենիչերիների էնտուզիազմով:

Սրանք Հայ Առաքելական Սուրբ Եկեղեցու դեմ պայքարում են թշնամու պես:

Սրանք մեր պետության դեմ պայքարում են՝ հանուն մեկ մարդու անձնական շահերի, մեկի, ով աճուրդի է հանել Հայաստանը՝ անունը դնելով «4-րդ հանրապետության կերտում»:

Ստորությունն այս պատմության մեջ այն է, որ Նիկոլն իր դավաճանության մեղավոր է նշանակում հայ մայրերին, որոնք, իբր, իրեն պատվիրակել են գնալ այն օրակարգով, որի արդյունքում հանձնվեց Արցախն ու հանձնվում է Հայաստանը: Նա իր հանցագործությունների համահեղինակ է կարգում հայ կանանց ու դա անում է իրեն հատուկ լկտիությամբ ու դեմագոգիայով:

Հարգելի՛ ժողովուրդ,

«Մայր Հայաստանն» ունի մեր երկրի համար խաղաղության, անվտանգության, բարգավաճման ապահովման հստակ պատկերացումներ, փոփոխությունների հասնելու կամք ու կարողություն:

Բոլորիս մաղթում եմ ուժ ու եռանդ՝ Հայաստանն այս պատմական խայտառակությունից ազատելու և մեր երկրի համար զարգացման նոր էջ բացելու համար:

Միասնաբար մենք անպայման հաջողելու ենք:

Շնորհակալություն: