Ուկրաինայի նախագահը հայտարարել է Ռուսաստանի հետ գերիների նոր փոխանակման մասին

Ուկրաինան պատրաստվում է Ռուսաստանի հետ գերիների նոր փոխանակման։ Այս մասին սեպտեմբերի 19-ին լրագրողների հետ հանդիպման ժամանակ հայտարարել է նախագահ Վոլոդիմիր Զելենսկին, հաղորդում է ՌԲԿ-Ուկրաինան։

«Ռուստեմը (Ումերով, - խմբ.) Մեդինսկու հետ խոսել է փոխանակման մասին. նրանք կապի մեջ են։ Մենք ուզում ենք 1000 մարդ ստանալ և մենք աշխատում ենք ցուցակի վրա», - ասել է նա։

Ուկրաինայի և Ռուսաստանի պատվիրակությունների միջև հանդիպման վերաբերյալ Զելենսկին նշել է, որ այս պահին հարցում «որևէ առաջընթաց չկա»։

«Մենք կարող ենք նրանց հետ հանդիպել թեկուզ վաղը, եթե ուզում ենք պարզապես խոսել։ Բայց մեզ արդյունք է պետք։ Մենք կարդացել ենք նրանց բոլոր հուշագրերը, մենք նրանց լավ գիտենք։ Եվ նրանք են մերը կարդացել, նրանք դրանք շատ լավ են ուսումնասիրել։ Նրանք գիտեն, թե ինչ են ուզում և մենք էլ գիտենք, թե ինչ ենք ուզում», - ասել է Ուկրաինայի նախագահը։

Նրա խոսքով՝ ռուսները «այժմ փորձում են ձգձգել բանակցությունները բոլոր հնարավոր միջոցներով և չեն ցանկանում, որ պատերազմն ավարտվի»։

«Նրանք կրկին ստեցին. Մենք հանդիպում ենք, կա փոխանակման վերաբերյալ համաձանություն և դրանից բացի համաձայնություն կա նաև այն ձևաչափի վերաբերյալ, որով առաջնորդները կհանդիպեն՝ փորձելով բանակցել պատերազմի ավարտի շուրջ, այս կամ այն ​​փուլում»։ Բայց նրանք հանդիպեցին և համաձայնեցին միայն փոխանակման շուրջ։ Նրանք վերադարձան և ասացին. «Եկեք շարունակենք քաղաքացիական անձանց փոխանակումը... քաղաքացիական անձանցից հետո կլինի զանգ Ռուստեմի հետ, մենք այն ավելի մանրամասն կքննարկենք»։ Նրանք զանգ ունեցան։ Հիմա ասում են. «Մենք հավանաբար պետք է ինչ-որ այլ բան անենք՝ տեխնիկական հանդիպումներ»։ Այսպիսով, նրանք ամեն ինչ հետաձգում են», - հավելել է նա։

Զելենսկին նշել է, որ այս հարցը կքննարկի ԱՄՆ նախագահ Դոնալդ Թրամփի հետ, իսկ նա էլ կզրուցի Չինաստանի հետ։

«Կարծում եմ՝ բոլորը քիչ-քիչ կաշխատեն, որպեսզի առաջնորդների մակարդակով հանդիպում տեղի ունենա», - հայտարարել է նա։