Ռուսաստանի ՊՆ-ն հայտնել է Ուկրաինայում ադրբեջանական արտադրության «Գյուրզա» զրահամեքենայի ոչնչացման մասին
«Ռուբիկոն» կենտրոնի FPV անօդաչու թռչող սարքերի անձնակազմը հատուկ գործողության ժամանակ ոչնչացրել է Ուկրաինայի զինված ուժերի ադրբեջանական արտադրության «Գյուրզա» զրահամեքենան, հաղորդում է ՌԻԱ Նովոստին՝ հղում անելով Ռուսաստանի պաշտպանության նախարարությանը։
«Հետախուզական միջոցառումների ընթացքում Ռուբցովսկու ուղղությամբ՝ Զարեչնոյե բնակավայրի մոտակայքում, հայտնաբերվել է ադրբեջանական արտադրության Ուկրաինայի ԶՈւ-ի «Գյուրզա» զրահապատ մեքենան։ Ռուսաստանի պաշտպանության նախարարության հեռանկարային անօդաչու տեխնոլոգիաների փորձարկման «Ռուբիկոն» կենտրոնի FPV-անօդաչուների հաշվարկները մի շարք հարվածներով խոցել են հակառակորդի մարտական զրահամեքենան», - ասվում է հաղորդագրության մեջ։
Ռուսաստանի պաշտպանության նախարարությունը պարզաբանել է, որ «Ռուբիկոն» կենտրոնի հարվածային անօդաչու թռչող սարքերի անձնակազմերի համակարգված մարտական գործողությունների արդյունքում ոչնչացվել է ուկրաինական զրահապատ մեքենան. օբյեկտիվ մոնիթորինգի համակարգերը իրական ժամանակում հետևել են դրա ինտենսիվ կրակին։
Հետևեք մեզ Viber-ում
