Էկոպարեկները պետական գնումներով ընդեղեն են գնել ու ծխախոտի գլանակներ IQOS-ի համար

ՀՀ շրջակա միջավայրի նախարարության էկոպարեկային ծառայությունը «Թթենի մարկետ» ՍՊԸ-ից 30.812 դրամի, ներառյալ հարկերը, առևտուր է արել։
«Փաստինֆո»-ն ուսումնասիրել է փաստաթղթերը։ Այսպիսով, սեպտեմբերի 2-ին «Թթենի» մարկետից էկոպերակները գնել են «Հալեպ» բոված պիստակ՝ 5339 դրամի, հնդկական ընկույզ՝ 4416 դրամի, «Բելլա Վիտա» հնդկական բոված ընկույզ՝ 5007 դրամի, թղթե փոքր տոպրակ՝ 50 դրամ։ Կատարված գնումներից ամենաուշագրավը HEETS terea ծխախոտի գլանակներն են՝ նախատեսված էլեկտրոնային ծխախոտի համար (IQOS), որոնց արժեքը կազմել է 16.000 դրամ։
Հաջորդ գնումը կատարվել է սեպտեմբերի 3-ին։ Այս անգամ գնումները կատարվել են «Վլադիկ Խանդիլյան» ԱՁ-ից։ ԱՁ-ից ձեռք բերված ապրանքների ընդհանուր արժեքը, ներառյալ հարկերը, կազմել են 11.670 դրամ։ Ձեռք բերված ապրանքներն են՝ տեղական ձմերուկը (2111 դրամ), նեկտարը (2585 դրամ), խոշոր դեղձը (3129 դրամ), պալչիկ տեսակի խաղող (1961 դրամ), մխիթար տեսակի խաղող (1734 դրամ) և 3 տոպրակ (150 դրամ):

Մյուս գնումները կատարվել են արդեն սեպտեմբերի 15-ին, կրկին «Թթենի» մարկետից։ Այս անգամ էկոպարեկները գնել են «Սանդորա» տրոպիկ 1 լիտրանոց բնական հյութ (810 դրամ), «Սանդորա» արքայախնձորի 1 լիտրանոց հյութ (810 դրամ), «Շառլետ» շոկոլադե կոնֆետ (790 դրամ), չամիչ (1089 դրամ), բոված հնդկընկույզ (3260 դրամ), դեղին խուրմա (409 դրամ), թխվածքաբլիթ «Մեղրով» Սմայլ Սվիթ (1350 դրամ)։ Ընդհանուր առևտրի գումարը կազմել է 8570 դրամը, ներառյալ հարկերը։

Այս գնումները ներկայացված են որպես ներկայացուցչական ծառայություններ, սակայն հարկ է նշել, որ կատարված գնումները սովորական մթերային գնումներ են՝ կատարված պետբյուջեի հաշվին։

«Փաստինֆո»-ն ավելի վաղ հայտնել էր, որ ՀՀ ՏԿԵՆ-ը ևս կատարել է անուշեղենի ու ընդեղենի գնումներ։