Գագիկ Սուրենյանը մանրամասներ է հայտնում․ ինչ ցիկլոն է ներթափանցում Հայաստան

Սև ծովի շրջանից մեր երկրին մոտենում է բավականին ակտիվ ցիկլոն։ Նրա ներթափանցումը կսկսվի այսօր ուշ երեկոյան ժամերին, իսկ տեղումնաբեր ամենաակտիվ գոտին Հայաստանում կլինի վաղը հետկեսօրյան ժամերին։ Այս մասին իր ֆեյսբուքյան էջում հայտնել է ՀՀ շրջակա միջավայրի նախարարության

«Հիդրոօդերևութաբանության և մոնիթորինգի կենտրոն» ՊՈԱԿ-ի տնօրենի տեղակալ Գագիկ Սուրենյանը։

Նրա հաղորդմամբ՝այսօր գիշեր առանձին շրջաններում, վաղը ցերեկային ժամերին Հայաստանի ողջ տարածքում սպասվում է անձրև և ամպրոպ։ Առանձին հատվածներում անձրևները կլինեն հորդառատ, հնարավոր է՝ կարկուտ։ Ամպրոպների ժամանակ սպասվում է քամու ուժգնացում՝ պոռթկումներով մինչև 18–20 մ/վ արագությամբ։

Ջերմաստիճանը կնվազի 8–12 աստիճանով, բայց սեպտեմբերի 20-ի ցերեկը կբարձրանա 4–5 աստիճանով․ «Այս ցիկլոնը իր հետ հյուսիս-արևմուտքից բերում է արկտիկական ցուրտ օդային հոսանքներ, ուստի վաղը ցերեկային ժամերին երկրի ողջ տարածքում օդի ջերմաստիճանը, այսօրվա համեմատ, կնվազի 8–12 աստիճանով։ Բայց սեպտեմբերի 20-ի ցերեկը կբարձրանա 4–5 աստիճանով։

Սեպտեմբերի 20–21-ն ընկած ժամանակահատվածում ցիկլոնը կկորցնի իր ուժը, տեղումները կպահպանվեն առանձին հատվածներում և կկրեն կարճատև բնույթ։ Սեպտեմբերի 22-ից սկսած՝ երկրի ողջ տարածքում տեղումները կդադարեն»,- ասել է Սուրենյանը։