«Քոչարի» կուսակցությունը խիստ դատապարտում և անհանգստություն է հայտնում կառավարության քայլի կապակցությամբ

«Քոչարի ազգային վերածնունդ և ազգի զարթոնք» կուսակցության պաշտոնական դիրքորոշում

Թեմա՝ Մասիս (Արարատ) լեռը անձնագրային մուտք/ելք կնիքներից հանելու կառավարության որոշման վերաբերյալ

«Քոչարի» կուսակցությունը խիստ դատապարտում և անհանգստություն է հայտնում այն կառավարության քայլի կապակցությամբ, որի արդյունքում պետական մուտք/ելք կնիքների վրա այլևս չի պատկերվելու Մասիսը՝ մեր ժողովրդի ամենաակունքային և սրբազան խորհրդանիշերից մեկը։ Ըստ պաշտոնական հաղորդումների՝ համապատասխան փոփոխությունը ընդունվել է վերջին կառավարական նիստերից մեկում և նախատեսված է ուժի մեջ մտնել այս տարվա հաջորդ ամսին՝ նոյեմբերի 1-ից։

Այս քայլը չի կարող դիտվել որպես զուտ գրաֆիկական կամ տեխնիկական լուծում։ Մասիսը պատմական, հոգևոր և ազգային խորհրդանիշ է, որը դարեր շարունակ միավորել է հայ ինքնությունը։ Նրա տեղը պետական խորհրդանիշներում ու հանրային պատկերներում առանցքային է։ Այսպիսի փոփոխությունները, ինչպիսին այս որոշումն է, անպայման պետք է լինեին հանրային լայն քննարկման առարկա՝ ազգային համաձայնության, մշակութային փորձաքննության և նույնիսկ օրենսդիր վերահսկողության ներքո։

Մինչդեռ այս որոշումը կայացվել է այն պահին, երբ ընթացքի մեջ են պաշտոնական բանակցություններ հարևան երկրի ներկայացուցիչների հետ՝ առաջացնելով հիմնավոր կասկածներ հնարավոր «զիջումների» մասին։ Այս համատեքստը խիստ մտահոգիչ է և ստիպում է մտածել, որ խորհրդանշական նման փոփոխությունները կարող են լինել քաղաքական հաշվարկների արդյունք։

Մենք հայտարարում ենք․

1. Այս քայլը համարում ենք ազգային խորհրդանիշի մթագնում և հերթական զիջում, որը վնասում է ազգային ինքնագիտակցությանը և մեր մշակութային ժառանգությանը։

2. Պահանջում ենք՝ որոշման փաստացի և իրավական բացատրությունը՝ հրապարակայնորեն, տրամաբանական հստակությամբ և ծրագրով՝ ինչի վրա է հիմնված փոխարինման անհրաժեշտությունը (տեխնիկական, անվտանգության, միջպետական պայմանավորվածություն և այլն)։

3. Կարևոր ենք համարում, որ առանց հանրային քննարկման նման նշանակալի փոփոխություններ չարվեն։ Առաջարկում ենք անցկացնել արտահերթ խորհրդարանական լսումներ և մասնագիտական քննարկումներ՝ մշակութաբանների, պատմաբանների, եկեղեցական և սփյուռքի ներկայացուցիչների մասնակցությամբ։

4. Կոչ ենք անում կառավարությանը հրապարակել բոլոր փաստաթղթերը, որոնք ցույց կտան, թե փոխարենը ինչ տեսք է ստանալու պետական կնիքը և ինչ երաշխիքներ կան ազգային խորհրդանիշների պահպանության համար ցանկացած միջազգային կամ երկկողմ համաձայնագրերում։

Լրացուցիչ զգուշացում․
Եթե իշխանությունները շարունակեն այս տրամաբանությամբ, ապա մնում է միայն դիմեն իրենց նախընտրած կաթողիկոսական թեկնածուներին՝ առաջարկելով նաև Աստվածաշնչի տեքստերից հեռացնել Արարատ լեռան հիշատակը, որպեսզի այն «չխանգարի» և «չանհանգստացնի» հարևան Թուրքիային։ Այսպիսի քայլերը ոչ միայն քաղաքական, այլև հոգևոր ինքնության խեղաթյուրում կլինեն, որոնք որևէ կերպ չեն կարող արդարացվել։

Մենք՝ «Քոչարի ազգային վերածնունդ և ազգի զարթոնք» կուսակցությունը, կոչ ենք անում համազգային միասնություն՝ պաշտպանելու Մասիսը որպես մեր ինքնության անկյունաքար։ Մենք պատրաստ ենք նախաձեռնել և առաջնորդել օրինական, մասնագիտական և համազգային գործընթաց՝ խնդրի արագ, արժանապատիվ և հրապարակային լուծման համար։

Հարգանքով,
«Քոչարի ազգային վերածնունդ և ազգի զարթոնք» կուսակցության վարչություն