Գյումրիում ցուցադրվել է Արցախի մասին պատմող «Լինում է, չի լինում» ֆիլմը

Այսօր Գյումրիում ցուցադրվել է ամերիկաբնակ Էմիլի Մկրտչյանի՝ Արցախի մասին պատմող «Լինում է, չի լինում» ֆիլմը։

Փաստավավերագրական ֆիլմի նկարահանումները սկսվել են 2018 թվականին, երբ Արցախում դեռ հարաբերական անդորր էր։ Ֆիլմը արցախցի 4 կանանց մասին է, ովքեր տարբեր բնագավառներ են ներկայացնում, ամենքն էլ իրենց բնագավառում կայացած անհատներ են։ «Լինում է, չի լինում» ֆիլմը նաև պատերազմական և հետպատերազմական` ապրող Արցախի մասին է։ Ֆիլմի հերոսուհիները 2020 թվականից հետո վերադառնում են Արցախ, որ նորից ապրի Արցախը։

Պատերազմից հետո նոր վերականգնվող Արցախի համար փակվում է կյանքի ճանապարհը։ Ֆիլմում ներկայացված է նաև շրջափակված Արցախից դրվագներ։

«Լինում է չի լինում» ֆիլմի 4 կանայք Արցախի վերջնական հայաթափումից հետո տարբեր բնակավայրերում են ապրում, փոխվել են նաև նրանց երազանքներն ու նպատակները։

Ֆիլմի հերոսներից միայն Սոսե Բալասանյանն էր ներկա ֆիլմի ցուցադրությանը։

Oragir.News-ի հետ զրույցում նա ասում է, որ թե՛ ինքն է փոխվել, թե՛ իր երազանքները։ Հիմա ամեն ինչին այլ աչքերով է նայում։ «Պատերազմից հետո թողեցի սպորտը, որովհետև այս կարգավիճակով չեմ կարող ներկայացնել իմ ազգը»,- ասում է Սոսեն։

Ֆիլմում էլ է Սոսեն քչախոս, ժպիտը դեմքին։

Մասնակցել է արցախյան վերջին պատերազմին, շատերի նման դժվարությամբ բաժանվել Արցախից։ Չմարող հույս ունի, որ նորից է վերադառնալու Արցախ։