Որ ասեիք՝ մեր գերիները պետք է օր առաջ վերադառնան, Ալիևը զանգելու էր, ասել՝ դուք ռևանշիստնե՞ր եք. Վարդանյան
Երեկ իմ գործընկերը դատավորի թեկնածուներին հարց տվեց՝ ինչ վեաբերունք ունեն Ադրբեջանում ընթացող դատավարության, հայ գերիների վերաբերյալ։ Սիրելի թեկնածուներ՝ ձեզ արգելվա՞ծ է ասել, որ գերիներ կան Բաքվի բանտերում, շինծու դատավարություն է ընթանում։ Այս մասին, այսօր՝ սեպտեմբերի 11–ին, ԱԺ-ում Վճռաբեկ դատարանի քրեական պալատի դատավորի թափուր տեղում ընտրելու համար ԲԴԽ կողմից առաջադրված դատավորներ Լուսինե Աբգարյանի, Արմեն Դանիելյանի և Նելլի Բաղդասարյանի թեկնածությունները քննարկելիս՝ իր ելույթում ասաց «Հայաստան» խմբակցության պատգամավոր Քրիստինե Վարդանյանը։
«Դա ի՞նչ պատասխան էր. ի՞նչ է նշանակում՝ «ես ՀՀ դատավոր եմ և կաշկանդված եմ ՀՀ օրենքներով»։ Ինչ էր տեղի ունենալու, որ ասեիք՝ ցավում եմ Բաքվում ընթացող շինծու դատավարության համար, մեր գերիները պետք է օր առաջ վերադառնան։ Ալիևը զանգելու էր, ասել՝ դուք ռևանշիստնե՞ր եք։ Կարմիր գծեր կա՞ն, թե՞ չկան։
Թեկնածուներից մեկի մասին, ընդհանրապես, պարոն Դանիելյան, Ձեր վճիռների արդյունքում հիմա ՄԻԵԴ-ում ՀՀ դեմ հայց կա, դրա հիմքերից մեկն այն է, որ Դուք գործերից մեկով պաշտպանական կողմին չեք լսել ընդհանրապես, չեք թողել ընդհանրապես պաշտպանական կողմը խոսի։ Երրորդ անգամ իշխող թիմը Ձեզ բերում է Վճռաբեկ դատարանի դատավորի թեկնածու։ Գոնե պատասխանատվությունը կլինի՞, որ ՄԻԵԴ-ում ՀՀ-ն պարտվի, գոնե Դուք հրաժարվեք, մի եկեք ավելի բարձր պաշտոնի»,-ասաց Քրիստինե Վարդանյանը։
Պատգամավորն, անդրադառնալով երեկ հարցուպատասխանի ընթացքում հայտարարություններին, հիշեցրեց ընդդիմության հասցեին նոր մեղադրանքի մասին, թե Միքայել Սրբազանն ընդդիմությանը քննադատել է, ինչո՞ւ են նրան քաղբանտարկյալ համարում։
«Հենց այդպես։ Դա է հենց մեր ու ձեր գլխավոր տարբերությունը։ Ինչ կապ ունի՝ մարդն ինչքան սուր է քննադատել կամ չի քննադատել, դա չի որոշում՝ մարդու նկատմամբ քաղաքական հետապնդում կա, թե ոչ։ Այդտեղ է երևում՝ ձերն արդարադատություն չէ, վրեժխնդրություն է»։
Պատգամավորը նաև ընդգծեց, որ Բագրատ սրբազանին և մյուսներին վերագրվող «ահաբեկչությունը», ամբողջական ձայնագրության հրապարակումից հետո ի չիք է դարձել։
«Իրական ահաբեկչություն էլ բացահայտեք, ոչ ոք ձեզ չի հավատա։ Դուք ամբողջ աշխարհին հայտարարել եք, անգլերենում թարգմանել եք, դեսպանատներին տվել եք, պաշտոնյաների անուններ եք տվել, թե իբր ում է ուզում գյուլլի։ Պարզվել է քննարկումը եղել է, թե դասալիքների հետ ինչպես պետք է վարվել։ Գործում ի՞նչ փաստական ապացույցներ կան, վերջը ի՞նչ պարզվեց։ 0, ոչինչ»։
Հետևեք մեզ Viber-ում
