Մանրամասներ տնային կալանքի տակ գտնվող անձի տան վրա զինված հարձակման գործից

«Փաստինֆո»-ի տեղեկություններով՝ երեկ Երևանում տեղի ունեցած սպանության գործով իրավապահներին դեռևս չի հաջողվել հայտնաբերել տնային կալանքի տակ գտնվող անձի տուն զինված հարձակում կատարած տղամարդուն, որը փախուստի է դիմել։

Հիշեցնենք, որ դեպքը տեղի է ունեցել երեկ՝ սեպտեմբերի 9-ի առավոտյան՝ Էրեբունի վարչական շրջանում։ Կրակոցների հետևանքով վիրավորում է ստացել մեկ տղամարդ, որը հիվանդանոց տեղափոխվելու ճանապարհին մահացել է։

«Փաստինֆո»-ն ավելի վաղ, հղում կատարելով աղբյուրներին, նշել էր, որ տնային կալանքի տակ գտնվող անձի տան վրա երկու անձ զինված հարձակում է գործել, ինչի հետևանքով փոխհրաձգություն է տեղի ունեցել՝ տնային կալանքի տակ գտնվող անձի և նրա տուն մուտք գործել փորձող անձանց միջև։ Փոխհրաձգության հետևանքով զինված հարձակման մասնակիցներից մեկը հրազենային վիրավորում է ստացել և մահացել։ Նշենք, որ տնային կալանքի տակ գտնվող տղամարդն, ըստ լուրերի, մեղադրվում է սպանության մեջ, պարզ չէ՝ տեղի ունեցողը վենդետա է, թե ոչ։

ՔԿ-ից պաշտոնապես «Փաստինֆո»-ի հետ զրույցում հայտնել էին, որ դեպքի առթիվ նախաձեռնվել է քրեական վարույթ՝ Քրեական օրենսգրքի 44-155-րդ հոդվածի 2-րդ մասի 7-րդ և 8-րդ կետերով (սպանության փորձը՝ այլ անձանց կյանքի համար վտանգավոր եղանակով, մի խումբ անձանց կողմից), 155-րդ հոդվածի 1-ին մասով (սպանություն), 44-155-րդ հոդվածի 1-ին մասով (սպանության փորձ), 335-րդ հոդվածի 1-ին մասով (հրազենի, դրա հիմնական բաղկացուցիչ մասերի, ռազմամթերքի և այլ նյութերի, սարքերի, առարկաների ապօրինի շրջանառությունը)։ Նույն աղբյուրի փոխանցմամբ՝ մեկ անձ ձերբակալվել է, կատարվում է նախաքննություն։

«Փաստինֆո»-ին հայտնի դարձավ, որ այս պահին ձերբակալվածը տնային կալանքի տակ գտնվող անձն է, իսկ նրա բնակարան զինված հարձակում գործած տղամարդկանցից մեկն անմիջապես դիմել է փախուստի և առ այս պահը նրան հայտնաբերել չի հաջողվել։

Հեղինակ՝ Իզաբել Սահակյան