Վաշինգտոնում ստորագրված փաստաթուղթը պարունակում է վտանգավոր ձեւակերպումներ․ Մովսես Հակոբյան

Վաշինգտոնում նախաստորագրված խաղաղության համաձայնագիրը պարունակում է վտանգավոր ձեւակերպումներ։ Այսօր նման հայտարարությամբ է հանդես եկել գեներալ-գնդապետ Մովսես Հակոբյանը՝ որպես օրինակ մատնանշելով փոխադարձության սկզբունքը։
«Փաստաթղթում ամրագրված փոխադարձության սկզբունքը վտանգավոր է։ Երբ այն գործնականում կյանքի կոչվի, կտեսնեք՝ ինչի մասին է խոսքը։ Դա ենթադրում է հետևյալը․ եթե Ադրբեջանի քաղաքացիները կարող են հատել ՀՀ-ի ինքնիշխան տարածքը, ապա նույն սկզբունքով Հայաստանի քաղաքացիներն էլ իրավունք են ստանում հատել Ադրբեջանի տարածքը։ Բայց հաշվի առնելով մեր բնակչության բաշխվածությունն ու տնտեսության վիճակը՝ դա կլինի 1-ը 20 հազարի հարաբերակցությամբ։ Այսինքն՝ մոտ 20 հազար ադրբեջանցի կարող է հատել Հայաստանի սահմանը, իսկ Հայաստանից՝ մեկ քաղաքացի»,– մանրամասնել է Հակոբյանը։

Մովսես Հակոբյանը ժամանակին վտանգավոր դրույթներ էր մատնանշել նաեւ նոյեմբերի 9-ի եռակողմ հայտարարության մեջ։ Ըստ նրա՝ նոյեմբերի 9-ի փաստաթուղթը պարտադրված էր, և երկրի ղեկավարը չէր կարող չստորագրել։ Այնուամենայնիվ, նրա կարծիքով՝ որոշ կետեր հնարավոր էր չընդունել․ մասնավորապես՝ 4-րդ և 9-րդ կետերը։

Դառնալով Հայաստանի համար վտանգավոր որոշումներ կայացնող, փաստաթղթեր ստորագրող իշխանությանը փոխելու հնարավորությանը՝ Մ. Հակոբյանը նշել է, որ դա հնարավոր է միայն ընտրությունների միջոցով։ «Մեր հասարակությունը վերջին 34 տարիներին անցել է տարբեր փուլերով և հիմա գտնվում է մի իրավիճակում, որտեղ բացի ընտրությունից այլ ելք չկա։ Ցանկացած պայքար հնարավոր է, սակայն պետք է հաշվի առնել, որ հայ ժողովրդին որևէ կամք պարտադրել հնարավոր չէ»,– նշել է Հակոբյանը։