Դավաճանություն. անցյալ, ներկա և ապագա. Թումասյան

Պետական դավաճանության համար երկու ամիս առաջ կալանավորված կնոջ պատմությունն ալեկոծեց բոլորին: Սպասենք դատաքննության այս դեպքով, սակայն, սա ոչ առաջին, ոչ էլ վստահ եմ վերջին դեպքն է: Այս մասին գրառում է կատարել Դավիթ Թումասյանը։

 «Դեռ 2000-ական թվականներին ԱԳՆ մի քանի ծառայողներ ենթարկվել են քրեական պատասխանատվության պետական դավաճանության համար: Նրանց թվում կային նաև կանայք, ովքեր դատապարտվել էին 15 տարի ազատազրկման և ովքեր այդ ամենը կրկին կատարել էին ի օգուտ մեր հարևան երկրի, սակայն իրենց մեղավոր չէին ճանաչում, ավելին՝ փորձում էին հիմնավորել ու արդարացնել իրենց արարքը:

2013 թվականին նույն հոդվածով դատապարտված մի տղամարդ, ով ՊՆ ծառայող էր նույն հիմնավորումներն ու արադարացումներն էր ներկայացնում:

 Նմանատիպ արդարացումներ լսեցի 2019 թվականին մեկ այլ դատապարտյալից՝ կրկին նախկին սպայից.....

Ակամա ստացվում էր, որ բոլոր այդ դավաճաններին սկզբից ուղեղներն են լվանում և այդպես հավաքագրում, ու նրանք իրենց արարքների մեջ ոչ միայն հանցավոր, անգամ պարսավելի արարք չեն տեսնում..... Ավելին, նրանց մի մասը դատապարտվելուց հետո թշնամանքով է լցվում Հայաստանի հանդեպ՝ մեղադրելով հայրենիքը, որին դավաճանել է...

Հ.Գ. Ցավոք, Վասակ Սյունիները դեռ կան մեր մեջ ու նրանց նկատմամբ պետք է լինի ամենախիստ պատիժը՝ անկախ սեռից, մաշկի գույնից, տարիքից, նախկինում զբաղեցրած պաշտոնից կամ այլ հանգամանքներից.....
Մենակ այս դեպքում մենք կնվազեցնենք դավաճանությունների դեպքերը, սակայն՝ ցավոք այն դժվար կլինի առհասարակ վերացնել, քանի որ ընչաքաղց ու շահամոլ ՀՀ քաղաքացիներ դեռ կան....»,- գրել է Թումասյանը։