Ինչպես է Իսրայելը պատերազմի ընթացքում հետևել Իրանի ղեկավարությանը. New York Times
Այս ամառ 12-օրյա պատերազմի ժամանակ Իսրայելը կարողացել է հետևել իրանցի առանցքային գործիչների տեղաշարժերին և սպանել նրանց՝ օգտագործելով անվտանգության ուժերի աշխատակիցների բջջային հեռախոսները:
Այս մասին ասվում է The New York Times-ի հոդվածում, որը բացահայտում է իսրայելական հարձակումից հետո իրանական հետախուզության հետաքննության արդյունքները: Զեկույցը մանրամասնում է, թե ինչպես է Իսրայելին հաջողվել հայտնաբերել բարձրաստիճան պաշտոնյաների և գիտնականների գտնվելու վայրը: Տեղեկատվության մեծ մասը հաստատել են պարբերականի իսրայելական աղբյուրները։
Պատերազմի սկզբում Իսրայելի հանկարծակի հարվածից երեք օր անց Իրանը հույժ գաղտնի խորհրդակցություն էր հրավիրել, և միայն բարձրաստիճան պետական պաշտոնյաների և ռազմական հրամանատարների նեղ շրջանակ գիտեր, թե երբ և որտեղ է այն տեղի ունենալու: Դա հունիսի 16-ին էր՝ Իսրայելի հետ Իրանի պատերազմի չորրորդ օրը, և Ազգային անվտանգության բարձրագույն խորհուրդը հավաքվել էր բունկերում՝ 30 մետր խորության վրա, Թեհրանի արևմուտքում գտնվող լեռնալանջի տակ:
Պաշտոնյաները, որոնց թվում էին նախագահ Մասուդ Փեզեշքիանը, դատական իշխանության և հետախուզության նախարարության ղեկավարներ, ինչպես նաև բարձրաստիճան զորահրամանատարներ, ժամանել են առանձին մեքենաներով: Նրանցից ոչ ոք բջջային հեռախոս չի ունեցել, քանի որ գիտեին՝ իսրայելական հետախուզությունը կարող է հետևել իրենց:
Չնայած բոլոր նախազգուշական միջոցներին՝ հանդիպման մեկնարկից անմիջապես հետո իսրայելական ինքնաթիռները վեց ռումբ են նետել բունկերի վրա՝ թիրախավորելով երկու մուտքի և երկու ելքի դռները:
Հատկանշական է, որ բունկերում ոչ ոք չի մահացել։ Երբ առաջնորդները ավելի ուշ դուրս են եկել բունկերից, նրանք հայտնաբերել են պայթյունների հետևանքով զոհված մի քանի թիկնապահների մարմինները:
Հարձակումը հանկարծակիի է բերել իրանական հետախուզությանը, և շուտով Իրանի իշխանությունները բացահայտել են անվտանգության համակարգի ակնհայտ բացը. իսրայելցիները հանդիպման մասին իմացել են՝ գաղտնազերծելով թիկնապահների հեռախոսները, որոնք ուղեկցում էին իրանցի առաջնորդներին և սպասում դրսում:
Հանդիպման մասնակիցների վրա իսրայելական հարվածի մասին տեղեկատվությունը, ինչպես նաև մանրամասներ այն մասին, թե ինչպես է Իսրայելը հետևել և հարվածել իրանցի պաշտոնյաներին և հրամանատարներին, հիմնված են իրանցի հինգ բարձրաստիճան պաշտոնյաների, Իսլամական հեղափոխության պահապանների կորպուսի երկու անդամների և Իսրայելի զինված ուժերի և հետախուզության ինը ներկայացուցիչների հետ հարցազրույցների վրա:
Հետևեք մեզ Viber-ում
