Դատախազությունը՝ բռնապետության հովանավոր․ Լեւոն Զուրաբյանի հանցագործության մասին հաղորդումն անտեսվել է

Պետության և կառավարության հետ իրեն նույականացնող Նիկոլ Փաշինյանի կողմից իշխանությունն ուզուրպացնելու վերաբերյալ հերթական դրվագին դատախազությունը կրկին չանդրադարձավ՝ ընթացք չտալով անգամ հանցագործության մասին հաղորդմանը։

Հիշեցնենք, որ օգոստոսի 28-ին Նիկոլ Փաշինյանը, փաստացի հայտարարելով, որ չի պատրաստվում կատարել ՀԷՑ-ի վերաբերյալ Միջազգային արբիտրաժի որոշումը, նշել է, որ կառավարությունը ինքն է, կառավարության դիրքորոշում ներկայացնող ինքն է, իսկ ովքեր համակարծիք չեն կամ ունեն այլ կարծիք պետք է ազատվեն աշխատանքից։ Իսկ հաջորդ օրն արդեն աշխատանքից ազատվեց ՀՀ ներկայացուցչության գրասենյակի ղեկավար Լիպարիտ Դրմեյանը, որի կարծիքով՝ ըստ գործող օրենսդրության ու միջազգայնորեն ստանձնած պարտավորությունների, միջազգային արբիտրաժային դատարանների որոշումները պարտադիր են կատարման համար։

«Կառավարությունում չի կարող որևէ մեկը իմ դիրքորոշմանը հակասող դիրքորոշում ունենալ: Կառավարությունը ես եմ: Եթե մարդիկ կան, որ իմ դիրքորոշմանը հակասող դիրքորոշում ունեն, թող դիմում գրեն ու շենքերից դուրս գան: Եթե ոչ, ես ինքս նրանց կհանեմ»,- մամուլի ասուլիսի ժամանակ հայտարարել էր Փաշինյանը։

ՀԱԿ փոխնախագահ Լևոն Զուրաբյանը հրապարակավ հաղորդում է ներկայացրել հանցագործության մասին՝ նշելով, որ Նիկոլ Փաշինյանի սույն հայտարարությունը իր մեջ պարունակում է Քրեական օրենսգրքի 441-րդ հոդվածով նախատեսված արարքի հատկանիշներ: Զուրաբյանը, դիմելով գլխավոր դատախազությանը, պահանջել էր քրեական վարույթ նախաձեռնել, ինչն առ այս պահը չի իրականացվել։

ՀՀ գլխավոր դատախազությունից «Փաստինֆո»-ի հարցին ի պատասխան նշեցին, որ նախաձեռնված վարույթի վերաբերյալ տվյալներ ՀՀ դատախազությունում առկա չեն։ Թե արդյո՞ք ընթացք տրվել է՝ կառույցից չհստակեցրին։

Փաստացի դատախազությունը կրկին աչք է փակել Փաշինյանի կողմից առերևույթ սահմանադրական կարգի տապալման, պաշտոնեական լիազորություններն անցնելու հերթական դեպքի վրա՝ գիտակցելով, որ օրենքով առաջնորդվելու դեպքում Աննա Վարդապետյանը պաշտոնանկ կարվի գլխավոր դատախազի պաշտոնից։ Դատախազությունում ու, ընդհանրապես, դատաիրավական ամբողջ համակարգը Փաշինյանին փաստացի նույնացնում է պետության հետ, իսկ նրա խոսքը վեր դասում օրենքից։

Հեղինակ՝ Իզաբել Սահակյան