ԿԳՄՍ–ն տապալել է 20-րդ դարի հայկական մոդեռնիզմի ամենակարեւոր կառույցներից մեկի վերականգնման աշխատանքները. Պետրոսյան

Անշարժ գույքի կադաստրի կոմիտեի նախկին ղեկավար, ճարտարապետ Սարհատ Պետրոսյանն անդրադարձել է Ծիծեռնակաբերդի շուրջ ստեղծված իրավիճակին։

«Ծիծեռնակաբերդի մասին կարելի է շատ գրել, դրա թե՛ քաղաքական-իդեոլոգիական մասի, թե՛ ճարտարապետական մասի, թե՛ հանրային ընկալումների մասին, բայց կարծում շատ կարճ կարեւոր է ֆիքսել հետեւյալը.

Մշակութային ժառանգության համար պատասխանատու մարմինն (երկար անունով նախարարությունը) հանդիսանալով պատվիրատու (նաեւ վերահսկող) տապալել է 20-րդ դարի հայկական մոդեռնիզմի ամենակարեւոր կառույցների մեկի վերականգնման աշխատանքները։ Այլ տարբերակ չէր էլ կարող լինել քանի որ նույն մարմինը տապալել է հուշարձանների պահպանության բնագավառն ամբողջությամբ, նախեւառաջ չկարողանալով ապահովել հուշարձանների վերականգնմամբ զբաղվող կազմակերպությունների լիցենզավորման կառուցակարգերի ստեղծումը։

Սրա մասին ավելի 1.5 տասնամյակ է ինչ բարձարձայնում ենք ու մենք դրա համար արեցինք առաջին քայլը, երբ ճարտարապետների պալատում առանձին արտոնագիր սահմանեցինք վերականգնող ճարտարապետների համար։

Չկայացնելով հուշարձանների վերականգման (շինարարական) կազմակերպությունների լիցենզավորումը պետական գնումների համակարգի համար մանկապարտեզի վերանորոգումը (որի նույնպես հիմնականում անորակ է լինում) չի տարբերվում հուշարձան վերականգնելուց։ էլ չեմ ասում միջնադարյան եկեղեցու վերականգնումն ու մոդեռնիստական կառույցի վերականգնման տրամաբանությունը 180 աստիճան տարբեր են։ Ու այս անկարողության շրջանակում արդեն մի քանի տարի ավելացված պետական ֆինանսավորումը հուշարձանների վերականգնման մասով լի է անդառնալի կորուստներով։

Մեր միակ հույսը վերականգնող ճարտարապետների փոքր ու նվիրյալ շրջանակներն են, որ կարողանում են մի կերպ խուսանավել այս փնթի կառավարման պայմաններում ու փրկել հուշարձանները չմասնագիտացված (չնչին բացառություններով) շինարարական կազմակերպություններից»,– գրել է նա։