Իսրայելի բանակը սկսել է Գազայի վրա հարձակման նախապատրաստական գործողությունները
Իսրայելի պաշտպանության բանակը նախապատրաստական գործողություններ է սկսել Գազա քաղաքի վրա հարձակման համար։
«Արմենպրես»-ի փոխանցմամբ՝ այս մասին Տելեգրամ ալիքում հայտնել է բանակի խոսնակ Ավիչայ Էդրին։
«Մենք չենք սպասում։ Մենք սկսել ենք Գազա քաղաքի վրա հարձակման նախնական գործողությունները և սկզբնական փուլերը և ներկայումս ինտենսիվորեն գործում ենք քաղաքի ծայրամասերում։ Մենք կխորացնենք մեր հարվածները և չենք վարանի, մինչև չվերադարձնենք բոլոր առևանգվածներին և ռազմականապես ու քաղաքականապես չոչնչացնենք ՀԱՄԱՍ-ին»,-նշվել է գրառման մեջ։ Նա նաև նշել է, որ Իսրայելի պաշտպանության բանակի ուժերը շարունակում են մարտերը Գազայի հատվածում՝ ծանր հարվածներ հասցնելով ՀԱՄԱՍ-ին։Օգոստոսի 8-ին Իսրայելի ռազմաքաղաքական կաբինետը հաստատել է Գազա քաղաքն ամբողջությամբ վերահսկողության տակ վերցնելու և պաղեստինյան անկլավում գործողությունը ընդլայնելու ծրագիրը:
Օգոստոսի 18-ին ՀԱՄԱՍ-ը դրականորեն է արձագանքել միջնորդների հրադադարի առաջարկին, և փաստաթուղթը հետագայում փոխանցվել է Իսրայելին: Օգոստոսի 20-ին Իսրայելի պաշտպանության նախարար Իսրայել Կացը հաստատել է պաղեստինյան անկլավի վարչական կենտրոնը գրավելու ծրագիրը, իսկ օգոստոսի 21-ին առաջարկվող ռազմավարությունը հաստատել է նաև Իսրայելի վարչապետ Բենիամին Նեթանյահուն։
Հետևեք մեզ Viber-ում
