Եթե երեխան արթնացավ, վազելով հասավ դպրոց, ինքը առաջին ժամին դեռ շարունակելու է մնալ քնած. կրթության փորձագետ

Վերջին տարիներին հոգեբանների և մանկաբույժների կողմից հետազոտություններ են անցկացվել, որոնք ցույց են տալիս, որ քնելը շատ կարևոր է երեխաների համար և նաև, որ երեխաների, այսպես ասած, կենսաբանական ժամանակացույցը ավելի հետ է։ Այս մասին NEWS.am–ի հետ զրույցում նշեց ԵՊՀ դասախոս, կրթության փորձագետ Սերոբ Խաչատրյանը՝ հավելելով, որ դպրոցներում դասերը 8.30-ից շուտ սկսելը բացասաբար է ազդում երեխաների հոգեկան առողջության վրա։

«Այսինքն իրենք առավոտյան ավելի դժվար են արթնանում, դրա համար վերջին տարիներին շատ առաջարկներ են եղել գիտնականների կողմից, դասերը չսկսել 8:30-ից շուտ, կամ լավագույն դեպքում 8:30։ Սա գիտնականների երաշխավորություն է, որովհետև հակառակ դեպքում երեխաները լիարժեք չեն քնում, քնած վիճակում գալիս են դպրոց, դա ազդում է տրամադրության վրա, առաջադիմության, դեպրեսիայի և այլն։

Եվ Միացյալ Նահանգներում, և աշխարհի շատ երկրներում վերջին տարիներին կա տենդենց դասերը ավելի ուշ սկսելու, իսկ ԱՄՆ–ում շուտ էին սկսում այն պատճառը, որ պիտի ծնողները մեկ–երկու ժամ ճանապարհ գնան, որ հասնեն աշխատավայր, դրա համար իրենց պետք է որ երեխան տնից շուտ գնա, որովհետև չի կարելի երեխային տանը մենակ թողնել, որ իրենք էլ հասցնեն աշխատանքի։ Դրա համար ԱՄՆ-ում 7:30 էին սկսում դասերը։

Մենք այդ խնդիրը չունենք, հա դրա համար կարծում եմ որ 8:30-ը նորմալ է և անգամ եթե կա հնարավորություն ավելի ուշ սկսելու, դա պետք է անել։ Նաև ասեմ, որ երբ որ երեխան արթնանում է, իր ուղեղը միանգամից չի ակտիվանում, մոտավորապես մեկ ժամ է պետք, որ ակտիվանա։ Հիմա եթե երեխան արթնացավ, վազելով հասավ դպրոց, ինքը, ըստ էության, առաջին ժամին դեռ շարունակելու է մնալ քնած, գումարած այդ վազքը, որ չուշանանք, հասցնենք։ Սրա արդյունքում երեխան նորմալ չի սնվի, նախաճաշի մշակույթը ավելի կվատանա»,–ասաց փորձագետը։

Դիտարկմանը, որ քաղաքապետարանը այդ որոշումը պայմանավորել է խցանումներից խուսափելու բացատրությամբ, Սերոբ Խաչատրյանն ասաց. «Մենք պիտի որոշենք՝ խցանումներն են ավելի կարևոր, թե երեխաների առողջությունը։ Եվ գուցե խցանումների հարցը լուծելու ավելի լավ ճանապարհ կա։ Ասենք, օրինակ, տրանսպորտը բարելավել, մարդիկ տեսնեն, որ տրանսպորտում հնարավոր է արժանապատիվ երթևեկել, ոչ թե խցկված, և մարդիկ հրաժարվեն մեքենաներից ու նորմալ գնան աշխատանքի»։

Նա նկատեց, որ օրինակ Վանաձորում դասերը սկսվում են ժամը 9–ին։

Նշենք, որ երեկ ԿԳՄՍՆ–ն հաղորդագրություն տարածեց, ըստ որի սեպտեմբերի 1–ից դպրոցներում դասերը սկսվելու են 15 րոպե շուտ, այսինքն ժամը 8.15–ին։